Ich Mert lanczman Barbara meyn Eliche hausfrau all meyn Erben vnd nachkumen Bekennen offenlich mitt disem brieff
fur aller menigl(ich) das wir rechtes redliches kauffs kauft haben den freyen hoff gelegen zu nidern Gerspicz mitt aller seyner
zu gehorung von der wirdigen Muter Junckfrauen Brigida dy zeyt priorin vnd swester Offra suppriorin vnd der gancz
Conuent des closters zu vnser lieben frauen in der Stat Brun der swester herbrig genant der dan hat gehort als eyn aygens guet
dem genanten closter vnd gothaus ligund zwisschen den Erbern Nachpaurn Michel prermulner zu ayner vnd Jorg scharwiczer
andern seyten vmb funfczig Marck Merherissher muncz als sy geng ist ym lant frey vnd ledig mitt aller zugehorung vnd
pesiczung wye von alters das vorgemelt Erwirdig Conuent besessen vnd yn gehalden hat Auch mitt verwillignus der Ersamen
fursichtigen weysen hern Burgermeyster vnd Ratt der Stat Brun als yeren fortheren dye zu bestimbten kauf verwilligt mitt
solicher bescheydenheyt das ich genanter Mert lanczman Barbara meyn hausfrau all meyn Erben besiczer vnd nachkumen des gedachten
hofs Schuldig vnd pflichtig seyn sollen vnd wollen dem oft gedachten wirdigen Conuent Jarlich(en) zu zinsen mitt ainem schock
lanczwerung wye dan grund zins recht haltet an alle hindrung yerung widrred yez als dan dan als yez zu ewigen zeyten
dar ynnen keyn gefar prauchen zu erdencken mitt geystlich ader mitt weltlich rechten ader wye es seyn mocht alles vnd yegliches
das dysern Jarlichen zins zu nachtayl reychet So von vns hyr Jnnen gedachten gegebn veraycht an alle mye vnd kost schaden dem
merrmals gedachtem Conuent Jarlich soll werden Namlich an zuheben auf den Nagstkunftigen Sant Jorgen tag zu zinsen eyn halb
schock vnd das ander halb schock allwegen auf Sant Michaels tag vnd also alle Jar Jarlich zu zinsen an alle widerred vnd zu
beslissung soliches kaufs seyn verordnet wordenn von her Burgermeyster vnd Ratt zu aynem tayl dy Ersamen weysen hern
hans Berald Waczlaw prrman hans Czeuthe vnd Lorencz Rimer der gleychen an meynem tayl dy ich erpeten hab der
Edel vnd fest her Sigmund pintha von Chrtyssowycz vnd dy Erbern Mannen Mauricz dy zeyt richter zu nidern gerspicz
Thoma sther Bernhart dy zeyt richter zu Cumbrowicz vnd mayster Michel melczer des zuwarer vrkund vnd pesser
sicherheyt Etlichs besluss hab ich gedachter Mert lanczman mitt hogsten vleys erpeten den Erwirdigen yn Gott vatter
her Stephan dy zeyt probst zu Cumbrowicz meynen aller gnedigisten grund hern das seyn gnad zu pesser bestatter
sicherheyt des Conuets sigill hirunden angehangen hatt doch seynen Gnaden vnd dem Conuent an schaden Geben zu
Brun montag nach Bartholomey 1 5 20 Jar