Ich Artleb von Mysliboricz mit allen meynen prüd(er)n vnd swestern meynes vet(er)n sun h(er)n waczlaben
dem got gnad vnd alle vns(er) erben bekennen offenbar allen lewten dy nu leben od(er) her noch zu künfftig
seyn an dysen prif daz wir vorkauft haben recht vnd redleich vns(er) rechten erbe zu kallendorf für
achtenthalben grossen iärleiches zins pömischer müns vnd merhischer zal mitt aller h(er)schaft
vnd allen nuczen vnd rechten nichtes nicht p(ro)sleich ausgenomen als wirs vnd vns(er) vorvod(er)n ge
habt haben vmb drey schok grosser pfenig dem erbn(n) vnd dem geistleichen man dem Apte vnd
dem ganczen conent des closters zu pruk gelegen pey znoym des ordens d(er) weyssen p(re)monstratenses
dy selben fuzenthalben grossen sullen dy erbn(n) prüd(er) des clost(er)s haben zu der pytanczen ewicleichen
zu rechtem erbe daz güt gelob wir obgenanten prüd(er) von Mysliboricz mit vns(er)n trewen in dem
nesten lant gepreche zu prünn in dy lanttafel legen dem vorgeschriben conent zu rechtem
erbe vnd freyn vor cristen vnd Juden vnd vor allermencleichs chriegen vnd Ansprüchen als lant recht
ist in dem land zu merh(er)n an alle arglist vnd widerred(e) darumb zu ayn(er) pess(er)n sicherhait dis(er) sach
hab ich obgenant(er) Artleb meyn insigel an gehangen an dysen prif vnd hab auch gepeten dy erbn(n)
h(er)n doberschen von schereticz vnd lücken von dwiczkas dy auch durch meynes pet willen habn
ir insigel an gehangen an geczeugniss dis(er) sach an dysen prif d(er) do geben ist noch cristes
gepürd dreyczehen hund(er)t jar vnd in dem dritten vnd achczigisten jar an dem mytewochen
des heyligen h(er)rn sant Mertens peychtigers vnd pyschofs