Wir Burgermaister vnd Rath der Statt Brunn sambt einer gantzen Jetzig: vnd kunfftigen Gemain allhiechte
selbst Schuldner Bekennen hiemit diesem Brieff offentlich vor Jedermenniglichen das Wir rechter vnd wahrer Schulden zuekhuen sein gelten sollen vnd bezahlen wöllen Funff Tausent Gulden Mährischer Landeswehrung Jeden de
roselben zue Siebentzig kreützer zuepairen dem Edlen Ehrnuesten Herrn Mattheüßen krepko von Löwenfeldt an Jetzto Eltisten deß Raths zue Ollmütz seinen Erben vnd Erbßnehmen oder getrewen diß Brieffs Inhabern, Diese Summa gelts versprechen Wir obgedach
ten vnsern Gläubigern deroselben Erben vnd getrewen diß Brieffs Inhabern von vnten gesetztem dato, vber Sechß Jahr das ist wann mann schreiben wirdt 1629. Jahrs am Jacobi Apostels Tag neben dem Landesgebreüchigen Interesse Sechß per Cento Jeden fl. zue Siebentzig
kreützer geraittet doch nur für vier Jahr solches Inentrichten gewißlich ohn allen behelff vnd außflucht wie die auch Menschen List erdencken zueerlegen vnd zuebezahlen. Vnd da Wir obbemelter Summa gelts vber benante zeit weiter nicht mehr bedurfftende sein würden
oder vnsere Gläubiger nicht lenger bey Vnß liegen lassen wolten, So soll ein Thaill dem andern ein halbes Jahr zuuor solches schrifftlich ankünden vnd auffsagen Nach welchem auffsagen vnd verflossnen halben Jahr Wir anfangs besagte Schuldner werden schuldig sein bey vnserm
wahren rainen glauben vnd Trawen ohne alle arge List, forcht oder gefahrde obgedachte Summa vnsern mehrgedachtem Gläubigern, sambt dem im auffgekhundten halben Jahr gefallen: vnd außstendigen Interesse alles in guetter damahls gehender kayserischen Müntz gantz
völlig vnd ohne abgang in Ihre hände gewaltsamb vnd wohnung zueerlegen vnd zuebezahlen. Imfall aber solches von Vnß nicht beschehe vnd wir mit bezahlung der Haubt Summa nachmahls auch für die vier Jahr verloffenen Interesse säumig sein würden vnd disem
allem oder zum thaill was in dieser vnserer Verschreibung gemeldet wirdt, nicht nachkommen würden, (das Gott gnedig verhuetten wolle.) So geben wir vnsern Gläubigern Ihren Erben vnd getrewen diß Brieffes Inhabern vollkommenen gewalt vnd macht vnß vnd vnsere Mit
Bürger keinen außgenummen wie sie darumben zue Rath werden, vnd in diesem Marggraffthumb Mähren gebreüchig ist zue Zahlung zubringen es sey mit der aufhaltung in Stätten, Märckten vnd Dörffern, In: oder ausser diß Marggraffthumbs Mähren wo Sy Vnnß
vnd obbemeltt vnsere Haab vnd Gütter betretten würden oder durch andere mittl ohne alle Rechtliche klage sich an Vnß zueerholen, souiel vnd so lang biß vnsere Gläubiger, Ihre Erben vnd getrewe diß Brieffes Inhaber, die Haubt Summa, Interesse vnd auffgeloffene Schäden dafern
Sy dero ainichs wegen vnser nichtzahlung oder zahlung angewendet vnderlitten hetten vnd Sy auffsagen vnd bescheinigen würden, bezahlet vnd contentirt werden. Darwider Wir in kainerley weege nithen sollen noch wöllen, Es soll vnß auch kein Recht, Freyheit vnd begnadung oder
Rechtlicher behelff noch Indult, darunder nicht schützen noch schirmen Sondern verzeihen Vnß derselben aller vnd Jeder vnd besunders derer, die Vnß zue Trost vnd bestem, vnsern Gläubigern aber zue Schaden kommen mochten alles Trewlich vnd vngefehrlich. Dessen zue Vrkundt vnd
vester haltung alles deß Jenigen, was hierinn geschrieben stehet haben Wir vnser der Gemainen Statt Insigl wissendt: vnd wolbedächtlich hiezu drucken vnd vorstecken lassen. Geschehen Brün am Jacobi Apostels Tag deß Sechßzehenhundertisten drey vnd zwaintzigisten Jahrs.