WIR Burgermeister vnd Rathmanne der Stadt
Olmütz, Bekennen vnd thuen kundt mit dießem Brieff vor Jedermenniglichen für Vnns vnd Vnnßere Nachkhommen, das Wir im nahmen eines rechten Wiederkauffs recht
vnd Redlich wie derselbe aller recht vnd gerichten, sonderlich aber dießer Stadt Olmütz gebrauch vnd gewohnheit nach am kräfftigsten vnd bestendigsten geschehen khan oder
mag verkaufft haben vnd in krafft dießes Brieffs hiemit verkauffen auf aller vnd Jeglicher gemelter Vnnßer Stadt Renten, Genüßen, Zinsen, Nutzen, Einkommen,
vnd gefällen Achtzehen Taller, Jeden deroselben p(ro) 70 kr(euzer) den kr(euzer) p(ro) 6 Heller reitendt rechtes, wahres Jährlichen Zinses Dem Ehrwürdigen vnd Wohlgelehrten Herrn Petro
Hassero Pfarrherrn zue Hermsdorff: vmb Dreyhundert Taller obiger wehrung die Wir albereit von Jhme völlig an bahrem gelde empfangen vnd an gemainer Stadt Nutz
vnd frommen gewendet; Welchen obgemelten Zinsz Wir also für Vnns vnd Vnnßere Nachkhommen Jetzige vnd Künfftige, globen vnd versprechen bey Vnnßern
wahren worten ermeltem Herrn Pfarrherrn, oder seinen getreuen Brieffs Jnhabern Jährlichen auf Zwey vnterschiedliche Termin von dato dießes Brieffs halb auf S: Georgij
künfftig 1626 Jahrs vnd die andere Helfft auff S. Michaelis hernach volgendt vnd also auf alle nachfolgende Zins tage Jährlichen zuegeben vnd Zuentrichten.
Doch wöllen Wir Vnns vnd Vnnßern nachkhommen hiemit in Crafft dießes Brieffs dieße vollkommene Freyheit vorbehalten haben, das Wir sollen vnd mögen
Obgemelte Achtzehen Taller Jährlichen Zinses von Obgedachtem Herrn Pfarrherrn wider Zu Vnns lößen vnd khauffen vmb obgemelte Dreyhundert Taller,
den Taller wie oben gerechnet, Jedermenniglichen vngehindert, wann vnnß solches gefällig sein wirdt: Es sollen auch solche von vnnß verkauffte Acht
Zehen Taller hinter mehr ermelten Herrn Pfarrherrn lenger nit, dann bis zue seinem von dieser Weldt abscheiden verbleiben, Nach seinem absterben aber, sollen
vnd mögen Wir, die selben wiederumb Zu Vnns vmb ermelte Haubt Summa der Dreyhundert Thaller von den Jenigen, denen er solche Summa wirdt vergünstiget
vnd vbergeben haben, einlößen vnd empfangen vnd diesen Wiederkauffs Brieff cassiren, vnd einen andern auf solche Summa geldes (dafern Wir dessen Nottürfftig
sein würden) vermög Vnnßerer Nachkommen, vnd Oftermelten Herrn Pfarrherrns Nachkömlingen freundtlichen vnterredung vnd vergleichung verfertigen zulaßen,
alles trewlich vnd ohn gefährde: Dießem allen zu wahrer Vrkundt vnd beßerer sicherhait haben Wir obgeschribene Burgermaister vnd Rathsmanne Vnnßerer Stadt gewöhn=
liches Jnsiegel wißendtlich an diesen Brief hangen lassen. Der geben vnd geschriben ist in Olmütz am Tag S: Georgij Des ain Tausendt Sechs Hundert Fünff vnd Zwantzigisten Jahrs