Wir Burgermaister Vnd Rathmanne
der Statt Olmutz. Bekhennen vnnd thuen khundt mit diesem Brieff vor Jedermenniglichen, für Vnns vnnd Vnnßer Nachkhommen. Das Wir
im Nahmen eines rechten Wiederkauffs, recht vnnd redlich, wie derselbe aller Recht vnnd gerichten, sonderlich aber dieser Stadt Olmutz gebrauch vnd gewohnheit nach
am khäfftigsten vnd bestendigsten bestehen khan oder mag, verkaufft haben, vnd in krafft dieses Brieffes hiemit verkauffen, auf aller vnd Jedlicher, gemelter vnser Statt
Rennten, geniesen, Zinsen, Nutzen, einkhommen vnd gefellen, Sechs vnd Dreyßig Taler, Jeden deroselben p(ro) Siebentzig Kreutzer, den Kreutzer p(ro) 6 hell(er) raitendt, rechtes
wahres Jährlichen Zinses, dem Ehrwurdigen vnd Hochgelahrten Herrn Magistro Andrea Marschalko von Johannesthal, der Zeit Techenden zue Zwittaw, vmb Sechs Hundert
Taler, obiger wehrung, die wir albereit von Ihme völlig an bahrem gelde empfangen, vnd an gemeiner Stadt Nutz vnd frommen gewendet. Welchen obgemelten Zinß
Wir also fur Vnns vnd Vnnßere Nachkhommen, Jetzige vnd Khunfftige geloben vnd Versprechen, bey Vnnßern wahren wartten, ermeltem Herrn Techent, oder seinen ge=
trewen Brieffes Innhabern, Jährlichen auf zwey vnderschiedliche Termin, von dato an dieses Brieffs halb auf S. Georgy künfftig 1626. Jahrs, vnd die anndere helfft, auf
S. Michaelis hernach folgendt, vnnd also auf alle nachfolgende Zinstage Jährlichen zuegeben, vnd zueentrichten. Doch wollen Wir Vnns, vnd Vnnßern Nachkhom=
men hiemit in krafft dieses brieffes diese vollkommene freyheit vorbehalt haben, das Wir sollen vnd mögen obgemelte Sechs vnd Dreyßig Taler Jährlichen Zinses
von obgedachtem Herrn Techent, wieder zue Vnns lösen, vnd khäuffen vmb obgemelte Sechs Hundert Taler, den Taler wie oben gerechnet, Jedermenniglichen vnge=
hindert, wann vnns solches gefellig sein wirdt. Es sollen auch solche von Vnns verkauffte Sechs vnd dreyßig Taler hinter mehr ermelten Herrn Techendt, lengernit,
dann bis zue seinem von dieser Weldt abtscheiden verbleiben, Nach seinem absterben aber, sollen vnd mögen Wir, dieselben wiederumb zue Vnns vmb ermelte haubt
Summa der Sechs Hundert Taler, von den Jenigen, denen er solche Summa wirdt vergunstiget vnd vbergeben haben, einlösen vnd empfangen vnd diesen Wiederkauffs
Brieff cassiren vnd einen andern auf Solche Summa geldes (dafern wir dessen Notturfftig sein wurden) vermög Vnnserer, oder Vnnserer Nachkhommen, vnd offtermel=
ten Herrn Techents Nachkhomlingen freindtlicher vnterredung vnd vergleichung verfertigen Zulassen, alles Trewlich vnd ohn gefehrde: Diesem allen zue wahrer
Vrkhundt vnd besserer sicherheit haben Wir obgeschriebene Burgermeister vnd Ratzmanne Vnnserer Stadt gewöhnliches Innsiegel wissentlich an diesen Brieff han=
gen lassen. Der geben vnd geschrieben ist in Olmutz am Tage Sancti Georgy Des ain Tausendt Sechs Hundert fünff vnd Zwaintzigisten Jahrs.