WIR Ferdinand der Dritte von GOttes gnaden Erwehlter Römischer Kaiser
zu allen Zeiten, Mehrer des Reichs, in Germanien, zu Hungern, Beheimb, Dalmatien, Croatien vnd Sclauonien (etc.) König, Ertzhertzog zu Osterreich, Marg
graff zu Mährern, Hertzog zu Lützenburg vnd in Schlesien, vnd Marggraff zu Laußnitz, Bekennen hiemit offentlich vor iedermänniglich, Wie daß Vns der Pater Rector deß Collegij Societ(atis) IESV zu Ollmütz, Georgius
Schönberger, zuvernehmen geben, Waß gestalt Er bedacht were, einen Hoff oder Vorwerckh, so Sie auff der Herrschafft Boding bißhero gehabt vnd besessen, zuverkauffen, Vnd daß Gelt darfür zu anderwertigem, deß Collegij nöthigen Notturfften an
zuwenden, Mit demüttigster bitt, Wir geruheten hierzu Vnsern Königlichen vnd Landtfürstlichen Consens, allermaßen ingleichen Ihre Geistliche Obrigkeit hierin Verwilliget hette, zuertheilen. Wann Wir
dann angesehen solche Ihre zimbliche bitt, auch daß diese alienation auß sonderbahrer Noth, Vnd zu deß besagten Collegij bessern Wolstandt fürgenommen würdt: Deß haben Wir den gebettenen Landtfürstlichen Consens hier
zu zugeben, billich Vrsach gewunnen. Thun daß, Vnd Consentiren darein hiemit, Vnd in Krafft dieses, alß Regierender König zu Behemb, Vnd Marggraff zu Mährern, Hiemit Vnd in Krafft dieses Brieffs wissentlich Vnd wolbedäch
tiglich, also Vnd der gestalt, daß nit allein gedachter Pater Rector deß Collegij zu Ollmütz solchen Hoff oder Vorwerckh frey Vnd Vngehindert zuverkauffen, zuverwechsßlen, oder sonst auffs beste alß Er waist Vnd kan zuveräußern, fug
Vnd Recht, Macht Vnd Gewalt haben, sondern auch der ienige, so solchen Hoff oder Vorwerckh durch rechtmässigen Titul an sich bringen würdt, sambt seinen Erben vnd künfftigen ordentlichen oder Rechtmässigen Inhabern, bey solchem Hoff Vnd Vor
werckh sicher Vnd ruhig sein, auch derentwegen der Geistligkeit anspruch halber ausser gefahr Vnd schaden erhalten werden soll, auff Vnser ohne männigliches Eintrag Vnd Hindernüß. Vnd gebieten hierauff Vn
sern Nachgesetzten Obrigkeiten, insonderheit aber Vnserm Königlichen Landtshaubtmannschafft in Marggraffthumb Mährern, Hiemit gnedigst, daß Sie ob diesem Vnserm Landtfürstlichen Consens handthalten, auch den ienigen, welcher ob
oldermelten Hoff oder Vorwerckh, durch Rechtmässigen Titul an sich bringen würdt, sambt seinen Erben, Vnd künfftigen Inhabern, darbey Vnstifflich schutzen Vnd schirmen, auch Sie darwider in kainerley weise noch weg, bedrängen noch beschwe
ren lassen, nicht anders thuen, noch es andern zuthuen gestatten, bey Vermeidung Vnserer schweren Straff Vnd Vngnadt, daß mainen Wir ernstlich. Zu Vrkundt dessen haben Wir gegenwertigen Vnsern Königlichen Consens Vnderschrieben,
Vnd mit Vnserm anhangenden Kleinern Insigel Verfertigen lassen, So geschehen in Wien den Vier Vnd zwaintzigsten Monatstag Maij, nach Christi Vnsers lieben HErrn Vnd Seligmachers gnadenreichen Geburth, im Sechtzehenhun
^...^
Ad Mandatum Sac(rae) Cae(sareae)
Maiestatis proprium
~Jo(hannes) Walder~