Wier Katharina Bogemiska vonn Bogemikz, Abbteßin des Gottshaus
Bey vnserfrauen In der Statt Znaymb, Anna Pryorin, Dorothea Cantryn, vnnd Sambt dem gantzen Conuentt Bekhennen
mit disem offnen Brieff, vor Jedermennigklichen Das vor vnns erschinen ist, der Eerwirdige vnnd geystliche Herr Petrus Silezius
der zeytt Pfarrherz, Inn vnserm marckht Friz, vnnd anngezaigtt, wie der Pfarrhoff zu Friz, gar sehr Eed, vnnd Pawfellig ist das es
vonn Nöttenn Jnn zu Pawen wer, Er aber wenn er Pawett (weyll wier alle sterblich seint) damit er auch deß zugeniessenn möcht
versorgett werdenn, welchs wier weyls vnns woll bewüst ist, vnns vmb aine versicherung, vnnd Confirmation, vber dise Pfarr
auff sein lebenlang demuetigklichenn gebetten hatt, Das er zu seinem Priesterlichen Standt Eerlich nach Ordnung der Cattolischenn
kyrchenn berueffenn sich allzeitt wollgehallten, Auch vnserm Kloster vill gediennt hatt, Jhm sein Billichs gebett, nitt habenn Ab=
schlagenn khönnen Sonder Jme zur Confirmation, auff sein lebentag alls ein vollmächtige Collatryx vber dise Pfarr geben
Auff das er alls ainem Catolischen Priester züestennndig ist, die Kyrchenn vleißig versehe, Alle zehennt wie sie denn möchttenn genantt werde(n)
Welche vonn allters zu diser Pfarr zu Friz gehörenn, Machtt hatt frey ohn alle verhinderuns, einzufordernn vnnd zugeniessenn darumb
Järlich zu Weynachtenn, Vnns vnnd vnsern Nachkömbling, alle Jar, jezt vnnd zu ewigen zeitten wie es vonn allters gewesen ist
ain Mutt waitz, ain mutth kornn, ain Mutt habernn zu gebenn schuldig Ist denn Pfarrhoff vleißig zu bessern vnnd zu Pawenn
zu welchem gebeü die gemain zu Friz, vonn Allters Robothenn schuldig Ist Entgegenn wier obenn Bemellte
Abbteßin nitt, sambtt dem gannzenn Conuentt vnnd allenn Vnserm Nachkömblingen, Versayssenn Jnn nitt möchttenn in erschwären
Bey seinem Leben, Auch nach seinem Todtt, was er vill oder wenig hette, Jhme vnnd denn seinigenn (oder wenn er ettwas guetts zuthun
vermeintt) nitt möchttenn darein zugreyffen noch anndernn zulassenn Sonndernn darüber handthalten, Vnnd frey ohnn alle ver=
hindernus Passiern Zu Vesterer Vrkundtt vnnd Syckerhaitt, Habenn wier Obbemellte Abbteßin vnser Abb=
teßin vnnd auch des Conuents Jnnysigill, außdruckhenn, vnnd Annhenngenn lassenn Welches gebenn ist den 14 Decembris
Anno Nach Christy Geburtt Tausent funffhundert vnnd ainundachtzigstenn Jar