MARTINUS CONSTANTINUS BEINLICH SACRI ac MILITARIS ORDINIS
Crucigerorum cum rubea Stella, Divina miseratione per Boëmiam Moraviam, Silesiam, ac Poloniam, electus Supremus ac Gene=
ralis Magister, Sacræ Cæsareæ Regiæq(ue) Majestatis Consiliarius, ac in Regno Boëmiæ Prælatus.
Venerabili Religioso, in Christo Nobis Sincere dilecto Joanni Francisco Josepho Rivola Ejusdem Sacri
militaris Ordinis Nostri Confratri, Vicario Generali, ac in Moravia ad D. Hyppolitum Præposito Salu=
tem à Domino, & Benedictionem Sempiternam.
NOSTRA HUCUSQ(UE) SEMPER EÒ DIRECTA FUIT ET DIVINA OPITULANTE ASSISTENTIA
deinceps pariter adhuc dirigetur cura & sollicitudo qualiter Sacri ac Militaris Ordinis Nostri avitum Traditionum
Prædecessorum, ac Statutorum morem non tantum quoad vivendi sed etiam quoad incedendi normam, ac rationem, quantum fieri
poterit, con-& observari procuremus ac provideamus. Cùm igitur ex Veterum monimentorum, uti & Statutorum
conclusis non modò Supremum ac Generalem Ord(in)is Magistrum, sed & Digniores & prælatiores saltem de Ordine
ad normam Melitensium Equitum, majorem, eâ qua in veste geritur, Crucem cum Stella etiam in pallijs detulisse, indu=
bitatum ac certum teneamus. Idcirco Nos Supremus ac Generalis Magister, quib(us) talia conservare
innovare, ac firmare ex Officij, & consvetudinis Jure incumbit, præmissorum intuitu, Venerabili in Xto Nobi(s)
Sincerè dilecto Joanni Francisco Josepho Rivola, intuitu exantlatorum laborum & in Ordine complurium ob=
tentorum ac deinceps adhuc sperandor(um) meritorum consolationem et benevolentiam contestari volentes specialem, hinc
Facultatem, ac Potestatem concedimus, conferimus ac providemus, quatenus ad modum et magnitudinem obtinendæ
à Nobis formæ, majorem crucem cum Stella etiam in pallio, non t(ame)n curto, sed decenti ac oblongo, idq(ue) cum Talari ve=
ste liberè ac placitè foris deferre valeat ac possit, in cujus robur hasce propria manu subscripsimus, et sigilli
Nostri appensione firmari fecimus. Pragæ in Solita Nostra Supremi Magisterij ac Generalatus Resi=
dentia 9 Junij Anno Millesimo Septingentesimo Octavo.
Martinus Constantinus Beinlich G(eneralis) M(a)g(iste)r m(anu) p(ropria)