Wir Ferdinand der Ander von Gottes gnaden Erwölter Römischer Khaiser
zu allen zeitten Mehrer des Reichs in Germanien, auch zu Hungern, Behaimb, Dalmatien, Croatien vnd Sclauonien König, Ertzhertzog zu Osterreich,
Marggraff zu Mährern, Hertzog zu Lutzenburg vnd in Schlesien, Marggraff zu Laußnitz (etc.) Bekhennen für Vns, Vnsere Erben, nachkhommende Könige
in Behaimb, vnd Marggraffen zu Mährern, mit disem brieffe, vnd thuen khundt menniglich. Das Vns der Ehrwürdige Vnser lieber getreuer Georgius Witas
sek, Probst des Gottshaußes Sancti Hÿppoliti auff dem Pöltenberg beÿ Znaimb, Vnderthänigist fürbringen geben, waßmassen von herkhommenthes
Gottshaußes, die Zeithero der Burglehn zu Znaimb, Jährigen Zins, Vnd Zwar Ein theils Korn, vnd ein theils habern, Vnd Zwar anfenglich freÿwillig, folgents
aber durch obseruirten brauch geraicht seÿn worden. Vnd hierauff demüetigist bittendt, wir geruheten solche Gaben an korn vnd ha
ber, gnedigist zu cassiren vnd auffzuheben. Wann wir dan gnedigist angesehen, solche seine gehorsambiste bitt, auch betrachte, das beÿ
nechstvergangener Rebellion vnd Aÿfstandt, offt erwenttes Gottshauß gantz außgeörent, ruiniret, vnd hierdurch in höchste erschöpffung, armuth
vnd abnehmen khommen. Alß haben wir mit wolbedachtem Mueth, rechtem wissen, vnd beÿgethanem zeitigen Rath, auß Regierender Behaimb
ischen Königlicher Macht, vnd als Marggraff zu Mährern, bemelts Gaben an korn vnd habern, allergnedigist cassirt vnd auffgehebt, also vnd dergestalt
das mehrermelts Gottshauß, vnd künfftige Pröbst zu Pöltenberg, von nun an, vnd zu ewigen zeitten, solche gaben, Vns, der Burglehn Znaimb, noch anders
wohin abzufüeren, vnd zu raichen, nicht schuldig, sondern daruon allerdings enthebt, freÿ vnd ledig sein sollen. Thuen solches auch hiemit, vnd in krafft
in krafft diß brieffs. Mainen, setzen vnd wöllen, das nun hinfüro, vnd zu ewigen zeitten, von khainem, dem Gottshauß, oder deßen itzigen
vnd künfftigen Pröbsten, offtangeregte Gaben, von niemanden, in khainen weeg, noch wege, gefordert, noch begehrt werden, sondern dasselbe gäntzlich
daruon enthebt, befreÿet sein, vnd verbleiben sollen, vnd mögen, von allermenniglich vngehindert. Vnd gebietten darauff allen vnd ieden, Vnsern
vnderthanen, was hohen oder Niderigen standts, ämbts oder wesens die seÿn, darumb Erbkönigreich Behaimb, vnd Marggraffthumb Mährern, für itziges vnd
künfftiges, hiemit ernstlich vnd vestiglich. Das sÿ vielbemelts Gottshauß Sancti Hÿppoliti auff dem Pöltenberg beÿ Znaimb, vnd deßen itzigen vnd
künfftige Pröbste, an diser Vnser gnedigisten Cassir, vnd enthebung, nicht Irren, noch verhinderen, noch solches andern zuthuen gestatten, Vill weniger beÿ
ihnen, diser begnadung zuwider, schirmen, vnd rügkhgang erweckhen lassen, deß iedes einem ieden, ob er sich Vnsere schwere straff, vnd vngnad zuuermeiden,
weiß mainen, vnd annehmen. Zu vrkhundt besigelt mit Vnserm Größern Königlichen anhangenden Insigel. Geben in Vnser Stat
Wien, den Vier vnd zwaintzigisten Monats tag Julij, des Sechtzehenhundert, Vier vnd zwaintzigisten, Vnserer Reiche, des Römischen im Fünfften, des Hungarischen im Sÿ
Ad mandatum Sac(rae) C(aesareae)
Maiestatis proprium