Michael Colbert abbas Præmonstratensis, Eiusdemq(ue) Ordinis Caput ac Generalis,
Christianissimo Francorum Regi a Consiliis, Reverendo ad(modu)m Confratri nostro Domino Norberto Ziletsky abbati Gradicensi
salutem, audito a Nobis et diligenti examine Iudicii perpenso mon(asterio)r(um) seu Circariar(um) Bohemiæ, Austriæ, Moraviæ et Silesiæ, statu
eorumq(ue) salubri Regimini quantum possumus prospicere volentes, Te de Cuius Religionis Zelo prudentia et integritate plurimam
habemus in Domino fiduciam, Nostrum prænominatorum mon(asterio)rum seu Circariarum, Circatorem seu Visitatorem fecimus et
deputavimus, facimus et deputamus per p(ræsen)tas; Dantes et concedentes Tibi plenam liberam et absolutam potestatem ac mandatum
speciale prædicta mon(aster)ia, locaq(ue) ab eis dependentia semel In tertio sequenti triennii anno, assumpto tecum instituti nostri
Priore vel Canonico Idoneo, visitandi et reformandi tam in Capite quam in membris; de Illorum statu et utroq(ue) Regimine Spirituali
et temporali, nec non personarum in ipsis residentium vita moribus et Institutis diligenter et canonice inquirendi, delinquentes
iuxta Ordinis statuta puniendi et coercendi, Statuta Ordinis, et ceremoniarum, Officii divini Ordinarium seu rituale promulgandi
et observari præcipiendi, contrarios usus et consuetudines reprobandi, tollendi, et Inhibendi, Deniq(ue) disciplinam Regularem sacris
canonibus Inhærendo, ubiq(ue) instaurandi et pro Ecclesiarum supra recensitarum Regimine tam in spiritualibus quam In
temporalibus ea omnia et singula faciendi, quæ Nos ipsi facere possemus si p(ræsen)tes ibidem adessemus, quæq(ue) ad Visitatorem
cum omnimoda Ordinis authoritate comissum quomodolibet pertinere dignoscuntur, Nos enim eam tibi potestatis
plenitudinem usq(ue) ad nostram revocationem comittimus et Impartimur. In Virtute S(anc)tæ obedientiæ et sub excomunicationis pœna
quam in omnes et Singulos rebelles ex nunc prout ex tunc ferimus in his scriptis mandantes, ut tibi tanquam Nobis prompte
pareant et obediant, tuaq(ue) salubria monita humiliter suscipiant et efficaciter adimpleant. Datum Parisiis In Ædibus
nostris Præmonstratensibus die duodecima decembris anno 1672 in quorum fidem p(ræsen)tas manu nostra et Secretarii nostri
Subscriptas Sigilli nostri impressione Iussimus comuniri.
f Michael Colbert abbas Præmonstratensis et generalis
De mandato Ill(ustrissi)mi Domini mei, Domini
Præmonstratensis Totius Ordinis Generalis
f Ludovicus Feraf