Wir purger zu Znoym Rudelff von Mispelczig zu den zeiten purgermaist(er) Chunr(at) Wendenussel Herr Eystl Hincz von Jernig Hartman Pilgram
Satler Fridrich Saphrian Herr Perchtmaist(er) Jacob Nuenkamp Symon Pincz Pethold und Wilhelm pey dem tor Wir verjehen an dem offen
brief alln leuten di den prief sehent oder horent lesen daz vns chunt vnd wissenlich ist daz der erb(er) man Chunr(at) der Hasmund
zu den zeiten Richter zu Znoym vnd sein Hausvrow vnd sein erben vnd wir von Tesicz vnd sein Hausvrow vnd sein erben haben bestanden
den Hof zu Tesicz mit paw mit allem nucz vnd mit allem recht vnd zu dem Hof gehert vnd als in and(er) leut vor innhaben waren
habent in gehabt wid(er) den erber(n) H(er)ren Apt Johann zu Pruk vnd wid(er) sein abteyen zu den zeiten enthaltist vnd wid(er) den ganczen
Conuent des selben chlosters von sand Michels tag der nu schirst chumt vber Neun iar vnd dar nach von sand Michels tag der
dar nach chumt vber ein gancz iar so schullen wir den vorgenanten H(er)ren zu chloster dem Conuent vnd dem Siechmaist(er) dinen zwo march gros
phuncz Znoym(er) gewicht vnd furbas di aht iar hin nach so schulle wir alle iar dem Conuent vnd dem Siechmaist(er) dinen zwo march gros
phuncz zwo march auf sand Jorgen tag vnd zwo march auf sand Michels tag der dar nach schirst chumt wer ab(er) daz daz an
dem paw schad geschech mit schaur mit gewaltig(er) hant mit vrliug des daz paw vderb von welich(er) lay sach daz wer daz an
vns schuld geschech so schulle wir mit ein and(er) auff daz paw reiten vnd schawen vn(d) schullen ez schaczen vnd ahten nach
vnd(er) leut rat ist dann vil schaden geschehen so ge vil an dem zins ab ist sein ab(er) lencz so get lencz an dem zins ab
daz schad noch vnsern leut rat geschehen wer ab(er) daz di daw oder di hicz oder di hicz paw daz stet an der H(er)ren gnaden daz schullen
sew an eins bedenken di H(er)ren schullen auch iren zehent vor auz nemen an alle irrung an alle hindernuss vnd gab wir den
vgenanten H(er)ren iren zins nicht zu den vorgenanten tagen so schullen sew sich des hofs vnd des paws wid(er) vnderwinden
mit vns(er)m guten willn fur den zins an alln chrieg daz alles lob wir zu leisten pey vns(er)n trewn wir lubn auch den hof
zu pess(er)n von iar zu iar nach vns(er)n eren so wir pest mugen sturb wir ab(er) daz got nicht geb so schullen vns(er) nehst
erbn den hof mit dem paw in habn vn(d) v(er)nemen recht als wir vor habn getan daz di red stet beleib dar vb(er) geb wir
dem Conuent vnd dem Siechmaist(er) den offen brief v(er)sigelt mit d(er) stat Insigel zu ein(er) geugnuss diss sach der prief ist gebn
nach Xp(ist)i gepurd dreuczehnhund(er)t iar in dem siben vnd dreissigistem iar des mantages vor sand Marie Magdalene tag