Ich Jacob hmekl Burger zu Znoym vnd alle meine Erben erster schuldinger der nachgeschriben schuld vnd wir Cztibor von krziweg
Waczlaw von Buczicz Gerig otick Johannes schlakenwerder Jeronimus Sigismundi vnd wolffpehm purgen fur den benanten Jacob
hmekl vnd fur seine Erben bekennen vnuersthaindenlich mit dem brieff vor allermeniglich die Jn sehen horn ader lesen werdn
das wir verkaufft haben vnd in krafft des brieffs verkauffen wir auff vnserm weingarten zu kewerling ain halb lehen mit
sechs gewanty im Tawerssperig fier schok Jarlichs czins viertzig behmisch grossen fur ain schok zuraiten vmb hundert hungrl
guld alweg dreissig behmisch grossen fur ain guld zuraiten dem Erwirdigen in Gote vater vnd herrn herrn Pauly Abt zu pruck
vnd seinem Conuent vnd namlich ainem seines Conuents pruder mit namen Mathias von Brunn welichen Czins wir zu
zwayen tagen im Jar raichen vnd bezallen sullen namlich zu sand Michels tag nachstkunfftig zway schok grossen landsweing
albeg fur ain schok vierzig behmisch gr(oschen) zeraiten vnd auff sand Gorgen tag zuhandt darnach folgund aber zway schok
behmisch gr(oschen) albeg vierzig behmisch gr(oschen) fur ain schok zuraiten das alles gluben wir bey vnsern guetten Cristenlichenn
trewen stet vnd vnzerprochenlich zuhalten als Erber frome lewt So wir das aber nicht teten geben wir obgeschriben
gesthol vnd purgen dem vorgeschriben herrn Paul Abt vnnd Conuent vollen mechtigen gewalt die hundert guld mit
allem versessen Czins zunemen vnd ausszupringen wo sie künnen vnd mügen auff aller vnser guetter vnd vnuersthai=
denlichen schaden Auch mügen vnd haben gewalt herr Abt vnd Conuent das sy vns sullen manen mit dem brieff
Jn aller der mass vnd form sam gewonhait ist im lande zu Merhern auff laistung vnd Juleger Vnd wer den brieff
haben wirt mit der vorgeschriben herrn Abts vnd Conuent guettem willen der hat vnnd sal haben alsouil gerech=
tikait zu allen obgeschriben dingen als herr Abt vnd Conuent selbs vnd ob in der zeit ainer aus den obgeschribn
purgen da got fur sy mit tod abgieng So geluben wir Gesthol vnd purgen bey vnsern guetten trewen in einem
manedt ainen andern also mügenden an sein stat zu vns zuseczen vnd den brieff vernewen vnd herrn Abt vnd
Conuent in Jr gewalt geben Des zu Vrkundt vnd sicherhait haben wir Gesthol vnnd purgen vnsere Jnsigl
zu dem brieff anhengen lassen doch mit vnserm guetten willen vnd wissen der geben ist zu Znoym
an mitichen vor sand Michelstag Nach Cristi vnsers lieben herrn geburth M v C vnd Jndem achten Jare