Wir die hernach geschriben sen Johans Grafe zu Swarczb(ur)g H(er)r Bocz zu Sern Herman von Cranchsfuelt Peczolt
Hafman Hannos Zcedelz Cuncze Mikel von Grobnuelz H(er)r Czak Marquart von Wustiraw Hannos von Purgk vnd
Jorgn die Ratha(er) vnd gesworn d(er) stat zu Plawen bekennen vnd tun kunt offenlich mit disem brief alln den die in
sehen od(er) horn lesen das d(er) allerdurchluchtigste furste vnd herre her Karl Romisch(er) keis(er) zu alln czeitn merer des Richs
vnd kunig zu Behem vns(er) lieb(er) gnedig(er) herre als eyn kunig zu Behem fur sich kunig Wenczlaw seynen sun seyne erben
vnd nachkomen kunige zu Behem der Edln Vrowen Vrow Juten von Cranchsfuelt weilen des edln h(er)rn h(er)rn eynricus vogtes
zu Plawen dem got gnade etlichen wittum fur ir heymstewre vnd morgengabe die ir der egen(ante) vogt h(er)r eynrich die weil
er lebte uf der stat vnd purgk zu Plawen vnd iren zubehorung vorschaft vnd vmacht hatte Tusent mark lotiges
Silbers vnd fur schult die d(er) egen(ante) vogt h(er)r eynrich noch seym tode schuldig bleip sechs hundirt schok vier schok vnd
gweinvndzwenczig grossen Pragisch(er) munge mit gutem golde ewicgclich vorrichtet vnd beczalt hat vnd derselbn
sechs hund(ir)t schoke werdn vierhund(ir)t schok im gerechent vnd abgeslagn fur die lehn d(er) vesten Schonek vnd irer zu
gehorungen die er domite vorgoltn vnd beczalt hat vnd so bleibet im seynen erbn vnd nachkomen kunign zu Be
hem die herschaft von Plawen noch schuldig Tusent mark lotiges silb(er)s zweihund(ir)t schok vier schok vnd gwein vnd
zwenczig grosse Prag(er) munge vnd des zu vrkunde vnd geczugnis habn wir disen brief vorsigelt lazen werdn
mit vnsirn alln anhangendn Ingesigeln der gebn ist zu Plawen an aller kindeln tag noch crists geburde drey
czenhund(ir)t Jar dornach in dem Sybenczigstem Jare .