Wir Ratlute vnd Burger gemenlichen der stat zu Arnswalde bekennen fur vns alle vnse erben vnd nachkomen Burger zu Arnswalde vnd fur dieselben stat ewiclichen vnd tun kunt offenlich
mit disem briefe allen den die yn sehen oder horen lesen Wann wir vormals gesworen vnd eiblichen gehuldet haben vnsm liebn gnedigen herren keiser karls sonen kunig wenczlaw von Behem seinen brudern
vnd yr aller erben vnd erbes erben als marggrauen zu Brandemburg vnsm rechten erbherren vnd ab die alle nicht weren marggrauen Iohan von meyhern des egen(anten) vns(er)s herren des keis(er)s bruder seinen erben vnd
erbes erben als das in andern vnsm briefen die wir yn druber geben haben vollenkomenlicher ist begriffen vnd wanne auch nu der egenante vnse herre der keiser sunderlichen betracht hat wie er die marken
zu Brandemburg mit yren landen steten vnd leuten die vormals langczeit mit manigvaldigem kriege verderbet vnd beswerdigt ist in ewigen fride vnd selikeit seczen muge vnd vns zu sunderlichen
gnaden gegunst hat vnd gan das wir vnd die egenante marken zu Brandemburg von dem kunigreiche vnd lande zu Behem der marggraffschafft zu lusicz den herczogtumen zu Bresslaw zu der
Swidnicz vnd an dem Iawer die zu dem kunigreiche vnd der cronen zu Behem gehoren vnd dasselbe kunigreich hinwider von vns vnd der marken ewigen schirm hulffe vnd rate haben mugen
vnd auch das wir vnd die marken zu Brandemburg vns zu demselben kunigreiche vnd lande zu Behem in ewige eynunge fassen vnd binden seczen mugen dauon zu eren vnd driste dem heili
gen Romischen Reiche durch ewigen fride besserungen vnd nuczes willen vnser vnd der marken zu Brandemburg die wir in disen sachen kintlichen erkant haben vnd eygentlichen erkennen So
haben wir mit wolbedachten mute guten vorrate vnd von vnser rechter wissen fur vns vnser erben vnd nachkomen ewiclichen vnd die egenant stat Arnswalde mit willen vnd volbord des egen(anten)
vns(er)s herren des keis(er)s als eines obristen lehenherrn der egenant marken zu Brandemburg dem vorgenanten vnsm herrn kunig wenczlawen allen seinen brudern vnd yr aller erben vnd nachkomen
die nu syn vnd hernach geboren werden kunige zu Behem vnd ab die alle nicht weren dem obgenanten marggrauen Iohan sen von meyhern allen seinen erben vnd erbes erben als marggrauen zu Bran
demburg vnsm rechten erbherren gelobt vnd gesworen Geloben vnd sweren in guten treuen ane alles geverde das wir ewiclichen bey dem kunigreiche vnd lande zu Behem beliben wellen vnd sullen
vnd wir sullen vnd wollen vns dauon nymmer scheiden oder scheiden lassen durch dheinerley sachen oder sachen willen in dheineweis Vnd wer es sache das vnse herrn kunig wenczlaw zu Behem
bruder erben oder vettern oder derselben erben vnd nachkomen die nu seyn oder in kunfftigen czeiten wurden vnser herren marggrauen zu Brandemburg yr herren eyner oder mer vns von dem kunigreiche
vnd lande zu Behem dem kunige vnd andern seinen brudern vettern erben vnd erbes erben die in czeiten vnser herren marggrauen zu Brandemburg seyn vnd werden scheiden wolten Oder ab sie die
marke zu Brandemburg zumale oder yr eyn teile von dem lande der marken seczgen verkauffen versaczen verwechseln oder empfremden wolten So sullen wir obgenan(anten) Ratlute Burger vnd stat
dem oder denselben nichtes pflichtig oder vnbunden seyn von huldungen wegen noch sust in dheineweis vnd den oder dye fur vnse herren nicht halten alle die weile das sie von sulichen sachen
nicht lassen Sunder vns halden an den kunig von Behem vnd an andre seine bruder vettern erben erbes erben vnd nachkomen die danne vnse herren marggrauen zu Brandemburg seyn oder
seyn werden Vnd die sulbe vorgenan(anten) scheidungen hingebungen verkauffungen versaczungen verwechselungen oder empfremdungen nicht teten Oder auch sache das die obgenant vnser herren ku
nig wenczlaw von Behem seine bruder vnd yr aller erben erbes erben vnd nachkomen kunige zu Behem vnd marggrauen zu Brandemburg der obgenant marggraff Iohans von meyhern
seine erben vnd erbes erben alle abesturben ds got fur sey So haben wir obgenant Ratlute vnd Burger zu Arnswalde fur vns vnse erben vnd nachkomen Burgere zu Arnswalde vnd fur dieselben stat
ewiclichen gelobt vnd gesworen Geloben vnd sweren von rechter wissen mit craffte dicz brieffs in guten treuen ane alles geverde einem iglichen kunige zu Behem der denne in czeiten wirdet vnd
ist das wir den vnd mit ym seine erben vnd nachkomen ewiclichen vnd nymand ands vor marggrauen zu Brandemburg vnse rechten naturliche erbherren haben vnd halten sullen vnd wollen
vnd vns von ym dem kunigreiche zu Behem seinen egenant furstentumen herschafften vnd landen die drczu gehoren nicht scheiden noch scheiden lassen sullen noch wollen in dheineweis ane
alles geverde Wenne es auch zu sulben schulden kumpt So sullen vns dieselben vnse erbherren vnse rechte briefe vnd freiheit bestetigen als yr vorvarn marggrauen zu Brandemburg getan
haben Vnd des zu ewigem vrkunde vnd ganczer sicherheit haben wir vns(er)s egen(anten) stat Insigel an disen brieff lassen hengen Dergeben ist zu Arnswalde nach Crists gepurt dreuczenhundert
Iare dornach in dem vierundsibenczigsten Iare an dem heiligen pfingest tage