Wir Rathlute vnd Burger gemeinlich der Stat Drossen Bekennen fur vns alle vnser erben vnd nachkomen Burger zu Drossen vnd fur die selb Stat ewiclich vnd tun kunt offenlich mit disem briue allen den
die yn sehent oder horent lesen, Wann wir vormals gesworn vnd eitlich gehuldet haben vnsers liben gnedigen herren keiser karls sonen kunig Wenczlaw von Beheim vnd seinen Brudern, vnd ir aller erben
vnd erbes erben, als markgrauen zu Brandemburg vnsern rechten Erbherren, Vnd ob die alle nicht weren, Markgrauen Johansen von Merhern, des obgenanten vnsers herren des keisers Bruder, seinen erben
vnd erbes erben, als das in andern vnsern briuen, die wir yn daruber gegeben haben vollenkomenlicher ist begriffen, Vnd wann ouch nu der egenant vnser herre der keiser sunderlich betracht hat wie er die
Marken zu Brandemburg, mit iren landen steten vnd leuten, die vormals langezeit mit manigualdigem kriege vorterbet vnd beschedigt ist, in ewigen fride vnd selden seczen muge, Vnd vns zu
sunderlichen gnaden gegunt hat vnd gun, daz wir vnd die egenant Marke zu Brandemburg, von dem kunigriche vnd lande zu Beheim, der Markgraffschafft zu lusicz den herczogtumen zu Bressla zu der
Swidnicz vnd zu dem Jawr die zu dem kunigriche vnd der kronen zu Beheim gehoren, Vnd dasselbe kunigriche hinwider von vns vnd der Marken, ewigen steten hilfe vnd rat haben mugen, Vnd
ouch daz wir vnd die Marke zu Brandemburg, vns zu demselben kunigreich vnd lande zu Beheim in ewige eynunge fast vnd fride seczen mugen, dauon zu eren vnd dinste dem heiligen Romischem
Riche durch ewigen fride besserunge vnd nuczes willen, vnser vnd der Marken zu Brandemburg, die wir in disen sachen kuntlich erkant haben, vnd eugenlich erkennen, So haben wir mit wolbedachte
mute gutem vorrat vnd von vnsern rechten wissen, fur vns vnser erben vnd nachkomen ewiclich, Vnd die egenant Stat zu Drossen, mit willen vnd wort des egenanten vnsers herren des keisers
als eines obristen lehenherren der egenanten Marken zu Brandemburg, dem vorgenanten vnserm herren kunig Wenczlawen, allen seinen Brudern vnd ir aller erben, erbes erben vnd nachkomen, die nu
sein vnd hernach geborn werden, kunige zu Beheim, Vnd ob die nicht weren dem obgenanten Markgrauen Johansen von Merhern allen seinen erben vnd erbes erben, als Markgrauen zu Brandemburg
vnsern rechten Erbherren, gelobt vnd gesworen, geloben vnd sweren in guten trewen an alles geuerde, daz wir ewiclich bi dem kunigriche vnd lande zu Beheim bliben wollen vnd sullen, Vnd wir sullen
vnd wollen vns dauon nymmer scheiden oder scheiden lassen durch dheinerlei stuck oder sachen willen, in dheinenweis, Vnd were es sache daz vnsers herren kunig Wenczlawes zu Beheim Bruder erben
oder vettern, oder derselben erben vnd nachkomen, die nu sein oder in kunfftigen czeiten werden, vnser herren Markgrauen zu Brandemburg, ir czeen einer oder mere, vns von dem kunigreiche vnd lande
zu Beheim, dem kunige vnd andern seinen Brudern vettern erben vnd erbes erben die in czeiten vnser herren Markgrauen zu Brandemburg sein vnd werden, scheiden wolten, oder ob sie die Marken zu
Brandemburg zumale oder ir ein teil, von dem lande der Marken vergeben verkauffen versetzen verwechseln oder empfremden wolten, So sullen wir obgenanten Rathlute Burger vnd Stat, dem oder den
selben nichtes pflichtig oder verbunden sein, von huldung wegen, noch sust in dheinenweis, Vnd den oder die fur vnser herren nicht haben, alle die weil daz sie nicht von sulchen sachen lassen, Sunder
vns halden an den kunig von Beheim, vnd an andere seine Bruder vettern erben erbes erben vnd nachkomen die denne vnser herren Markgrauen zu Brandemburg sein oder sein werden, Vnd die sulche
vorgenante scheidunge vergebunge verkauffunge verseczunge verwechselunge oder empfremdunge nicht teten, Were ouch sache daz die obgenanten vnser herren kunig Wenczlaw von Beheim seine Bruder
vnd ir aller erben, erbes erben vnd nachkomen kunige zu Beheim vnd Markgrauen zu Brandemburg, der obgenant Markgraff Johans von Merhern, seine erben vnd erbes erben, alle abesturben, dz
got fur sei, So haben wir obgenanten Rathlute vnd Burger zu Drossen fur vns vnser erben vnd nachkomen Burger zu Drossen vnd fur dieselb Stat ewiclich gelobt vnd gesworen, geloben vnd sweren
von rechter wissen, mit krafft dicz briues in guten trewen an alles geuerde, einem iglichem kunige zu Beheim, der denne in czeiten wirdet vnd ist, daz wir den vnd mit ym seine erben vnd nachkomen ewi
clich vnd nymand anders fur Markgrauen zu Brandemburg, vnsern rechte naturliche erbherren, haben vnd halden, sullen vnd wollen, Vnd vns von ym, dem kunigriche zu Beheim, seinen egenanten
furstentumen herschefften vnd landen die darzu gehoren, nicht scheiden noch scheiden lassen, sullen noch wollen in dheinenweis, an alles geuerde, Wenne es ouch zu sulchen schulden kumpt, So sullen
vns dieselben vnser Erbherren vnsere rechte briue vnd freiheite bestetigen, als ir vorfarn Markgrauen zu Brandemburg, getan haben, Vnd des zu ewigem vrkund vnd ganczer sicherheit haben
wir vnser egenanten Stat Insigel, an disen briue lassen hengen, Der geben ist zu Drossen nach Cristus geburte Dreuczenhundert Jare darnach in dem Vierundsibenczigstem Jare an dem heiligen
Pfingest tage