Wir Ratleute vnd Vnsere gemeynlichen der Stat zu azorin bekennen fur vns alle vnsere Erben vnd nach komen Burger zu azorin vnd fur dieselben Stat ewiclichen vnd
tun kunt offenlichen mit disem briue allen den die in sehen oder horen lesen Wenn wir vormals gesworen vnd eitlichen gelubde haben vnsers lieben gnedigen herren key=
ser karls Sone künig Wenczlawen von Beheim vnd seinen Brudern vnd ir aller Erben Erbeßerben als marggrauen zu brandumburg vnsern rechten Erbherren vnd ob die
alle nicht weren marggrauen Johansen von merhern des egenanten vnsers herren des keysers Bruder seinen Erben vnd Erbeßerben als das in andern vnsern briuen
die von im daruber geben vollenkomenlicher ist begriffen Vnd wenn ouch der egenant vnser her der keyser nu sunderlichen betrachet hat wie er die marke zu brandum=
burg mit iren landen Stetten vnd leuten die vormals lange zeyt mit manigfaldigem krige vorterbt vnd beschediget ist in ewigen frid vnd phlicht seczen müge
vnd vns zu sunderlichen gnaden gegunst hat vnd getat das wir vnd die egelanten marke zu brandumburg von dem künigreiche vnd landen zu beheim der marggraue=
schafft zu lüßig des herczogtümen zu Breßlaw zu der Sweydnicz vnd zu dem Jawer dye zu dem künigreiche vnd der Cronen zu Beheim gehoren vnd dasselbe künigreich
hinwider von vns vnd der marken ewigen schucze helffe vnd rate haben mügen vnd ouch das wir vnd die marken zu brandumburg vns zu demselben künigreiche vnd
landen zu Beheim in ewige eynunge faste vnd frid seczen mügen dauon zu eren vnd dienste dem heyligen Romischen Reyche durch ewigen friden beßterungen vnd nuc=
zes willen vnser vnd der marken zu brandumburg die wir in diesen sachen kündlichen erkant haben vnd eygentlichen erkennen So haben wir mit wolbedachtem müte
gutem vorrate vnd von vnsern rechten wißen fur vns vnsere Erben vnd nachkomen ewiclichen vnd die egenante Stat zu azorin mit willen vnd volbort des egenanten vnsers
herren des keysers als eynes obersten lehenherren der egenanten marken zu brandumburg dem vorgenanten vnserm herren künig Wenczlaw allen seinen Brudern vnd ir aller
Erben Erbeßerben vnd nachkomen dye nu seyn vnd hernach geboren werden künigen zu beheim vnd ob die nicht weren dem obgenanten marggrauen Johansen von merhern
allen seinen Erben vnd Erbeßerben als marggrauen zu brandumburg vnsern rechten Erbherren gelobt vnd gesworen Geloben vnd swern in guten trewen ane alles geuerd
das wir ewiclichen bey dem künigreiche vnd landen zu beheim bleyben wollen vnd sullen vnd wir sullen vnd wollen vns dauon nymmer scheyden oder scheyden lassen durch
keynerleye sachen oder sachen willen in dheyneweis Vnd were es sache das vnsers herren künig Wenczlaws zu Beheim Brudere Erben oder vettern oder derselben Erben vnd
nachkomen dye nu seyn oder in künftigen zeyten wurden vnsern herren marggrauen zu brandumburg ir vettern eyner oder mer hie von dem künigreiche vnd landen zu
Beheim dem künige vnd andern seinen Brudern vettern Erben vnd Erbeßerben die in zeyten vnsern herren marggrauen zu brandumburg seyn vnd werden scheyden wolden
oder ob sie dye marke zu brandumburg zümale oder ir eyn teyl von dem lande der marken teyden vorkauffen vorseczen vorwechseln oder empfremden wolden So sul=
len wir obgenanten Ratleute Burger vnd stat den oder dieselben nichtes phlichtig oder vorbunden seyn von huldungen wegen noch sust in dheyneweis vnd den oder
dye fur vnsern herren nicht haben also dye weyle das sie nicht bey sulchen sachen lassen Sunder vns halden an den künig zu beheim vnd an andre seyne Brud=
re vettern Erben Erbeßerben vnd nachkomen dye denne vnsern herren marggrauen zu brandumburg seyn vnd seyn werden vnd die sulchen vorgenanten scheydun=
gen teylungen vorkauffungen vorseczungen vorwechselungen oder empfremdungen nicht tetten Wer ouch sache das die obgenanten vnser herren künig Wencz=
law von Beheim seyne Brudere vnd ir aller Erben Erbeßerben vnd nachkomen künige zu beheimien vnd marggrauen zu brandumburg der obegenant
marggraff Johans von merhern seyne Erben vnd Erbeßerben alle obsterben da got fur sey So haben wir obgenanten Ratleute vnd Burgere zu azorin fur vns vn=
sere Erben vnd nach komen Burgere zu azorin vnd fur dieselben Stat ewiclichen gelobt vnd gesworen Geloben vnd swern von vnsern wißen mit krafft diz brie=
ues in guten trewen ane alles geuerd eynem iglichen künige zu beheim der denne in zeyten wirdet vnd ist das wir den vnd mit ym seyne Erben vnd nachko=
men ewiclichen vnd nymant anders fur marggrauen czu brandumburg vnsern rechten naturliche Erbherren haben vnd halden sullen vnd wollen vnd vns von
ym dem künigreiche zu beheim seynen egenanten furgenomenen herschafften vnd landen dye darzu gehoren nicht scheyden noch scheyden lassen sullen noch
wollen in dheyneweis ane alles geuerd Weme es ouch zu sulchen schulden kympt So sullen vns dieselben vnsere Erbherren lassen nehen briue vnd freyheite
besiczen als ir vorfarn marggrauen zu brandumburg getan haben Vnd des zu ewigen vrkund vnd ganczer sicherheyt haben wir vnser egenanten Stat
Jngesigel an diesen brieff lassen hengen der geben ist zu azorin nach Cristes geburt dreyczenhundert Jar darnach in dem fierundsibenczigsten Jare an dem hey
ligen pfingsten tage