Wir Ratlewte vnd Burgere gemeinlich der Stat zu Priswalke Bekennen fur vns alle vnse erbn vnd nachkomen Burgere zu Priswalke vnd tun kund offenlich mit disem briue allen den die yn sehen oder
horent lesen Wann wir vormald gesworen vnd ewklich gehuldt habn vns(er)s liebn gnedigen herren keis(er) Karls Sunen kunig Wenczlawen von Beheim vnd seinen Brudern vnd ir aller erbn vnd erbes erben
als Marggrauen zu Brandenburg vnsern rechten erbherren vnd ab die alle nicht weren Marggrauen Johansen von Merhern des egenan(ten) vns(er)s herren des keisers Bruder seinen erbn vnd erbes erbn als das
in andern vnsern Briuen die wir yn daruber gebn habn vollenkomenlicher ist begriffen Vnd wann auch nu der egenant vns(er) herre der keiser sunderlichen betracht hat wie er die Marken zu Brandenbg(urg)
mit weylanden steten vnd luten die vormald lange zeit mit manigfaldigem kriege vortrubet vnd beschediget ist in ewigen fride vnd selickeit seczen muge Vnd vns an sunderlichen gnaden gegunnet hat
vnd gan das wir vnd die egenant Marken zu Brandenburg von dem kunigreiche vnd lande zu Beheim der Marggraueschaft zu lusicz den herczogtumen zu Slesien zu der Swidnicz vnd zu den Jawr
die zu dem kunigreiche vnd der Cronen zu Beheim gehoren Vnd dasselbe kunigreiche hinwinder von vns vnd der Marken ewigen schucz hilfe vnd rat habn mugen Vnd ouch das wir vnd die Marke zu Brandenburg vns
zu demselbn kunigreiche vnd lande zu Beheim in ewige eynige fassen vnd friden seczen mugen dauon zu eren vnd nucze dem heiligen Romischen Reiche durch ewigen fride besserunge vnd nuczes willen vns(er) vnd der
Marken zu Brandenburg die wir in disen sachen kentlich erkennet habn vnd erkennen So habn wir mit wolbedachtem mute gutem vorrate vnd von vnsern rechten wissen fur vns vnse erbn vnd nach
komen ewiclich vnd die egenante Stat zu Priswalke mit willen vnd volbord des egenan(ten) vns(er)s h(er)ren des keis(er)s als eynes obristen lehenh(er)ren der egenanten Marken zu Brandenburg dem vorge(nan)ten vns(er)m herren
kunige Wenczlaw allen seinen Brudern vnd ir aller erbn erbes erbn vnd nachkomen die nu sein vnd hernach geborn werden kunige zu Beheim Vnd ab die alle nicht weren dem obgenanten Marggrafen Johansen
von Merhern allen seinen erbn vnd erbes erbn als Marggrafen zu Brandenburg vnsern rechten erbherren gelobt vnd gesworen geloben vnd sweren in guten trewen an alles geuerde das wir ewiclichen
bey dem kunigreiche vnd lande zu Beheim bleibn welln vnd sulln vnd wir sulln vnd welln vns dauon nymer scheiden od(er) scheiden lassen durch deheinerley stucken oder sachen willen in dheinenweis Vnd weres
sache das vnsers h(er)ren kunig Wenczlaws zu Beheim Bruder erbn oder vettern oder derselbn erbn vnd nachkomen die nu sein oder in kunftigen zeiten werden vns(er) h(er)ren Marggrafen zu
Brandenburg ir weren eyner oder mer vns von dem kunigreiche vnd lande zu Beheim dem kunige vnd andern seinen brudern vettern erbn vnd erbes erbn die in zeiten vns(er) herren Marggrafen zu
Brandenburg sein vnd werden scheiden welden oder ab sie die Marken zu Brandenburg czumale oder eynen enteil von dem lande der Marken vergebn verkauffen verseczen oder entfremden wel
den So sulln wir obgenan(ten) Ratlute Burgere vnd Stat dem oder denselbn nichtes pflichtig oder vorbunden sein von huldungen wegen noch sust in dheinenweis Vnd den oder die wir vns(er)
herren nicht habn alle die weile das sie von sulchen stucken nicht lassen sunder vns halten an den kunig von Beheim vnd an andere seine bruder vettern erbn erbes erbn vnd nachkomen die denne
vnsere h(er)ren Marggrafen zu Brandenburg sein oder sein werden Vnd die sulche vorgenan(te) scheidungen vergebungen verkauffungen verseczungen vorwechselungen oder entfremdungen nicht
teten Were auch das die obgenant(en) vns(er) herren kunige Wenczlaw von Beheim seine bruder vnd ir aller erbn erbes erbn vnd nachkomen kunige zu Beheim vnd Marggrauen zu Brandenburg
der obgenan(te) Marggraue Johans von Merhern seine erbn vnd erbes erbn alle abesturben do got fur sey So habn wir obgenan(ten) Ratlute vnd Burgere zu Priswalke fur vns vnsere erben
vnd nachkomen Burgere zu Priswalk vnd vor dieselbe stat ewiclichen gelobt vnd gesworen gelobn vnd sweren von rechten wissen mit crafft dicz briues in guten trewen an alles geuerde eynem
iglichen kunige zu Beheim der denne in zeiten wirdet vnd ist das wir den vnd mit ym seine erbn vnd nachkomen ewiclichen vnd nymand anders vor Marggrauen zu Brandenburg vns(er)n
rechten naturlichen erbherren habn vnd halden sulln vnd welln Vnd vns von ym dem kunigreiche zu Beheim seinen egenan(ten) furstentumen herschefften vnd landen die drczu gehoren nicht scheidn
noch scheiden lassen sulln noch welln in dheinenweis ane alles geuerde Wenne es auch zu sulchen schulden kumet so sulln vns dieselbn vns(er) erbherren vnser rechte briue vnd friheit bestetigen
als ir vorfarn Marggrauen zu Brandenburg getan habn Vnd des zu ewigen vrkunde vnd ganczer sicherheit habn wir vns(er) egenan(ten) Stat Jngesigel an dysen brieff lassen hangen der gebn
ist zu Priswalke nach Cristus geburte dreiczenhundert Jar dornach in dem Einvndsibenczigistem Jare in dem heiligen Pfingst tage