Wir Karl von gots gnaden Romischer kaiser zu allen zeiten merer des Reichs vnd kunig zu Beheim Bekennen vnd tun
kunt offenlich mit disem briue allen den die yn sehen oder horen lesen das wir dem hochgeborn Albrechten herzogen zu
osterrich zu Steyr zu kernden vnd zu krayn Grauen zu Tyrol (et)c(etera) vnserm lieben Sone vnd fursten vnd seinen leibes
erben schuldig seyn vnd gelten sullen Czehentausent schok grozer pfenninge prager munge vmb die manigualdigen
nugen dinste die er vns vnd dem Reiche daher getan hat vnd auch furbas wol getun mag Vnd haben gelobt fur vns
vnd den durchleuchtigen kunig Wenczlawen von Beheim vnsern lieben Sone vnd fur vnser Erben vnd geloben auch wis
sentlichen mit craffte diz brieffs dasselbe gelt dem egenan(ten) herzog Albrechten oder seinen leibeserben zu richten vnd
zu kieren ynner dem nehsten Jare dornach so der obgenan(te) kunig Wenczlaw vnser Sone zu Romischem kunige gekronet
wirdet ane alles becziehen vnd geuerde Odir yn aber in derselben Jares frist dafur zu seczen in pfandesweise vnser Stete
vnd geslos mit Tausent schocken grozer pfenninge der egen(anten) munge Jarlicher gulte da sie desselben geltes vnd der Jerli
chen gulte sicher vnd gewis seyn ane geuerde vnd argeliste Wer aber das wir dem obgenan(ten) herzogen Albrechten oder
seinen leibeserben die geslos vnd gulte ledig machen die wir vnd die hochgeborne katherine Herzogen Otten von Be
yern eliche gemahel vnser liebe tochter haben zu osterrich fur Czehentausent schok der egen(anten) munge nach wei
sunge der briue die wir vnd sie daruber haben des sal sie benugen vnd sullen auch wir drumb von yn ledig seyn
ane widerrede vnd geuerde mit vrkund diz brieffs versigelt mit vnser keyserlichen maiestat Infigel der geben ist
zu Eger nach Crists gepurt dreiczenhundert Jare dornach in dem funfvndsibenczigsten Jare an des heiligen Criste
tage vnser Reiche in dem Newnvndzwenczigsten vnd des kaisertums in dem Czwenczigsten Jaren

de man(dato) d(omi)ni Imp(erato)ris
de poznan(ia) Marland(us)