Wir Wenczlaw von beheim von gotes gnaden herczog zu luczelmburg zu lymburg vnd zu brabant vnd marggraue des heyligen Romischen Reichs beken=
nen vnd tun kunt offenlichen mit disem briefe allen den die yn sehen oder horen lesen Das wir zu vndersteen vnd zubewaren kunftige Jnfalle vnd stosse
die nach vnserm tode ab wir ane erben elichen von vnserm leybe komenden sturben da got fur sey dem herczogtume vnd herschafft zu luczelmburg zu komen
vnd offersteen mochten Mit wolbedachtem mute gutem vorrate vnse(r) vnd desselben herczogtumes zu luczelmburg banriczen edeln Rittern manne vnd stet=
ten eyntrechticlichen vertragen gemachet geschicket vnd geordiniret haben Machen schicken vnd ordiniren mit rechter vnser wissen in crafften dicz brie
ues / Gescheet es das wir ane elichen erben von vnserm leybe komende sturben des got nicht enwolle So sol das egenant herczogtum zu luczelmburg sey=
ne manne Ritter knechte stette alle seyne herlichkeyt vnd zugehorungen erblichen gefallen vnd erben vff die Allerdurchleuchtigsten fursten vnd herrn
he(r)n karl Romischen keyser zu allen zeiten merer des Reichs vnsern lieben herren vnd bruder vnd vff vnsern lieben herren vnd vettern herren Wenczlawen Ro=
mischen kunig vnd kunig zu beheim seynen son vnd vff ire erben vnd nachkomen kunige zu beheim Nemlichen den der denne kunig zu beheim ist recht rich=
ticlichen vnd erblichen gefallen vnd erben ane allerleye hindernisse Wenn sie von rechtem veterlichem stamme vnd linien rechte erben seyn nach vns an dem
egenanten herczogtume zu luczelmburg aller seyner herlichkeyt vnd zugehorungen ab wir sterben ane eliche erben vnsers leybes als dauor begriffen ist Were ouch
sache das wir sturben vnd nicht sone sunder tochter alleyne eyne oder mer elichen von vnserm leybe komende hinder vns liessen So ist vnser ordenunge gesecze
wille vnd wort das dieselben vnser tochter mit rate vnd wissen des egenanten vnsers herren des keysers des Romischen kunigs oder irer erben oder nachkomen
der denne kunig zu beheim ist bestattet vnd beraten sullen werden Vnd diese vnsere ordenunge vnd schickunge geloben in eydes weyse von vnserm geheisse vnd
gelobe banrecze herren Ritter knechte manschaffte vnd stette des herczogtumes zu luczelmburg in iren offenen besigelten brieuen stete vnd vaste zubalden
ane widerrede vnd ane alles geuerde Ouch so haben die egenante vnser herre vnd bruder der keyser vnd vnser vetter der Romische kunig vnd kunig zu beheim
fur sich vnd ire erben kunige zu beheim sunderlichen vorbrieuet ab es zuschulden kumpt das als dauor begriffen ist das herczogtum vnd herlicheit zu
luczelmburg vff sie vorfellet vnd erbet das sie denne alle manschafft Ritter knechte vnd stette vnd vndersessen Geistliche vnd werltliche desselben herczog=
tumes vnd herlichkeyt zu luczelmburg vnd irer zugehorungen bey iren alten freyheiten gewonheiten vnd rechten bleyben lassen sullen vngehindert vnd
ane alles geuerde Ouch behalten wir vns muge vnd macht vns zubehelfen mit dem vorgenanten herczogtume zu luczelmburg vnd seyner zugehorunge
nach vnserm freyen willen als mit vnser erblicher herschaft vnd gute ob vns des chafte kuntliche not seyn wurde ane argelist vnd ane alles geuerde Vnd
behalten ouch vnser muter der kuniginnen vnd vnser lieben elichen gemahel der herczoginnen von luczelmburg vnd brabant irer beyder lybgedinge mitga=
be vnd bewysunge dye sie haben ire lebtage in dem vorgenanten herczogtume zu luczelmburg vnd seynen zugehorungen nach ynhalde vnd begriff sulcher brie=
ue die sie daruber haben ane alles geuerde mit vrkunt dicz brieues versigelt mit vnserm angehangendem Jngesigel der geben ist zu luczelmburg nach crists
geburt drevczenhundert Jar darnach in dem Achtundsibenczigsten Jare des nehsten samabends vor vnser frawen tage der lichtmessen