Wir Wenczla von gotes gnaden Romischer kunig ze allen zeiten merer des Reichs vnd kunig zu Beheim Bekennen vnd tun kunt offenlich
mit diesem brief allen den die yn sehen odir horen lesen Daz fur vns komen ist der hochgeborn heinrich herzog zu dem Brige vnser lib(er)
oheim vnd furste vnd legt vns fur wie daz er die hochgebornen Ruprechten vnd Bouzlawen herzogen zu lignycz vnse lieben oheim
vnd fursten sulche schulte vnd gelte dorumb er sie vorseczt hat vnd sie fur yn Burge worden sein ab an im ichtes geschehe von todes
wegen ee dann sie geloset wurden in vnd auf dem eegelde etweim der hochgebornen Agnesen seiner muter vnd elena seiner elichen
wirtinn ufzuheben vnd zunemen / vorschaffet vnd gemachet hette als daz in seinen briefen die er in dorubir geben hat wol
begriffen ist vnd bate vns mit fleisse daz wir zu sulchem gescheffte vnd mechtinisse vnse gunst vnd willen geben vnd es besteten
gnediclich geruchten des haben wir durch lieb fruntschafft vnd trew der wir vns zu demselben vnsern oheim vorsehen vnd auch
durch willen sulcher dinste die er vns getan hat vnd furbas tun mag in kunfftigen zeiten mit wolbedachtem mute vnd recht(em)
wissen zu sulchem egenant(em) gescheffte vnser willen vnd gunst geben vnd es bestetet vnd besteten mit crafft dicz briefs wisse(n)t
lich(en) vnd von Behemisch(er) kuniglich(er) mechte also swie daz derselbe vnser oheim h(er)czog heinrich von todes wegen abginge ee
dann er die egen(anten) vnsire oheim h(er)czogen Ruprecht vnd h(er)czog Bouzla von sulcher schult do fur er sie vorseczt hat ledig
machte als vorbegriffen ist daz denn dieselben vnse oheim h(er)czog Ruprecht vnd h(er)czog Bouzla sich ledig mogen vnd
sullen mit vnd von sulchem egen(anten) egelde noch laute sulcher briefe die er in doruber geben hat als vorgeschriben stet mit
vrkunt dicz briefs vorsigelt mit vns(er) Romischen kuniglich(en) maiestat Insigle Der geben ist zu Nurenberg noch Crist(es)
geburd dreyczehnhundert Jar dornach in dem Newn vnd Sibenczigstein Jare an vns(er) frawen tage lichtmesse vnser(er)
Reiche des Beheimisch(en) in dem Sechzenden vnd des Romischen in dem Drytten Jaren