Wir Diterich von Torgow Bekennen vor vns vnd vnß Erbn in dysem offin brive allen den dy in an sehen horen adir lesen Also als der Edele
Her Thime von Coldig Camermeyst(er) des Romisschen koniges vnd houptman zcu Bresslow vnß(er) lieber Ohme vnd seine Erben vns vnd vnsern
Erben abekoufft han Byssin vnß hawz mit aller nutzschafft vnd mit aller zcugehorunge als wir vnd vnser Erben daz gehabt han vor
eyn vnd dreyssig hundirt vnd drey vnd sechtzig schok gross(er) vnd achte vnd dreyssig gross(er) bemisches geldes Die er vnd seine Erbn vns vnd vnser
Erben gancz vnd gar gerecht vnd bezalt haben Vnd den selben egnante(n) kouff gelobe wir egnante(n) Diterich von Torgow vnd vnser Erben
vnd vnser Eliche gemahel fraw margrethe stete vnd gancz zcu halden vnd die selben guter alle mit eynander vnd icliches besundern gelobe
wir zcu geweren vnd zcu entwern vor allermenniclich Als in dem Land eyn Recht ist Auch gelobe wir egnante(n) Diterich von torgow
vnd vnser Erben Alle ayantschafft die wir gehabt han vff zcu lassen fur vnsern Herren den marggrafen von meysen fur vnsern Herren
dem Byschoffe von meysen Adir von wilchem fursten adir Herren wir lehen gehabt han er sy geystlich adir werttlich vnd sullen die weisn
an den Egenante(n) Hern Thimen von Coldig Adir an seine Erben adir zcu yren getruwen Handen An den Edeln H(er)n H(er)n Albrecht von
Lypnik H(er)n zcu mugiln mit arg vnd mit alles geverde czwisschen hie vnd sente michels tage der schirst kumpt Auch gelobe wir daz vnser
margrethe vnser Eliche gemahel ir leypgedinge auch auff lassen sal fur den Egnante(n) vnserm H(er)n dem marggrafen von meysen vnd
vor vnserm H(er)n dem Byschoffe von meysen auch czwisschen hie vnd sente michels tage der schirst kumpt Vnd were daz der Egenante
vnß Herre der Byschoff von meysen by der zcit nicht zcu lande queme So sullen wir vnd auch vnß vnß egnante gemahel margrethe dy
thun vnd auff lassen vor dem Capitel zcu meysen adir vor seinem vicarien in Eptalib(us) Vnd mochte dy denne nicht krafft vnd macht
gehaben Also daz der offtgenante Her Thime von Coldig vnß Ohme vnd seine Erben da mete bewart weren So gelobe wir Egenante(n)
Diterich von Torgow vnd vnser Erben vnd mit sampt vns vnser liebe frunde die hir nach geschriben sten Her Bothe von Ileborg zcu
Strelle gesessen Her Busthe von Bygans houptman zcu mulberg Her Bothe von Ileborg H(er) zcu wudenbrucke Her Hanns der Jun=
geste von waldenberg Her Albrecht von Schonburg H(er) zcu Egerberg vnd mulich von Amblingshayn Als vnser Borgen in
desen gelobden zcu sten also lange bis das der Egenante vnser Herre der Byschoff von meysen zcu Lande kumpt vnd ab der nymer were
vnd in der wist abesturbe do got vor sey Adir eyn ander Byschoff wurde So sulle wir vnd geloben in desen gelobden zcu sten bis daz
vns eyn Byschoff zcu meysen wirt der volle macht vnd krafft hat Alle ding zcu thune do mete der Egenante Her Thime von Col=
dig vnd seine Erben wol bewart werden Vnd daz wir alle dese oben geschriebene stucke vnd Artikel als sie oben geschriben sin stete
vnd gancz halden wollen ane arg vnd ane alles geverde Gelobe wir Egenante(n) Diterich von Torgow vor vns vnd vnser Erben vnd
wir Egenante(n) Borgen Her Bothe von Ileborg zcu Strelle gesessen Busthe von Bygans houptman zcu mulberg Bothe von Ileborg
zcu wudenbrucke Hanns der Jungeste von waldenberg Albrecht von Schonburg gesessen zcu Egerberg vnd mulich von Amblings=
hayn geloben ouch bi vnsin guten truwen mit krafft dis briefes Dem Egenante(n) Hern Thimen von Coldig vnd seinen Erbn
vnd zcu seinen vnd seiner Erbn Handen den Edeln H(er)n H(er)n Albrecht von Lypnik H(er)n zcu mugiln H(er)n Oten von Ileborg H(er)n zcu
Ileborg H(er)n Heinriche vnd H(er)n Oten gebrudern von Coldig vnd den wolgebornen H(er)n H(er)n Ende Nykel von Stupitz vnd leu=
ther Schellenberg Alle obengeschriebn stucke vnd artikel stete vnd gancz zcu halden ane arg vnd ane geverde Vnd wo wir des
nicht teten vnd dy Egenante(n) Guter vnd vesten Jar vnd tag nicht entwerten vor allerleye anssprache als in dem lande eyn
Recht ist Adir die ayantschafft nicht vullen weysten an den Egenante(n) H(er)n Thimen von Coldig vnd an seine Erben adir an den
Egenante(n) H(er)n Albrecht von Lypnik H(er)n zcu mugiln zcu getruwer hant als oben geschriebn stet czwisschen hie vnd sente michels tage der
schirst kumpt Adir vnß Egenante Diterichs von Torgow Eliche woyp vraw margrethe ir leypgedinge nicht auff liesse auch czwisschen hie
vnd Sente michels tage der schirst kumpt vnd wir Egenante(n) Selbschuln vnd Borgen dar vmb gemant wurden von dem Ege=
nante(n) H(er)n Thimen von Coldig adir seinen Erben adir von dem Egenante(n) H(er)n Albrecht von Lypnik adir von den Egenante(n) H(er)n
gebrudern von Coldig adir von des Egenante(n) H(er)n Thimen von Coldig mannen zcu der Hant wir gelobt habn So sullen wir vnd
geloben bie vnsin guten truwen vnser iclicher mit czeen pferden vnd mit eyme knechte zcu stund nach ire manunge in reiten byn=
ne adir bynne acht tagen in der Stete eyne in eyn Erber Herberge do wir von in in gewyset werden vnd darynne eyn Inleger
leysten vnd sullen dar auz nymer enkomen wir habn denne alles daz gehalden als oben in disem briefe geschriebn stet Vnd were
ez sache daz der Egenante H(er) Thime von Coldig adir seine Erben dar obir keynen schaden nemen den sie kentlichin beweisen
mochten den selben schaden gelobe wir in auch zcu richten vnd auz den Inleger nymer zcu komen wir habn denne es gehalden
alles daz aben an disem briefe geschriebn stet Auch were ez sache daz vnß Egenante(n) eyner bis der czeit abeginge von todes
wegen do got vor sie So gelobe wir by vier wochen eynen andern an seine stat zcu seczen der als gut were als der abgegange
gewest were Vnd wo wir des ouch nicht enteten vnd wir dar vmb gemant wurden So gelobe wir ouch in zcu riten in der czweier
egenante(n) Stete eyne vnd darynne leysten als obengeschriebn ist vnd auz der leystunge nymer zcu komen wir haben denne eyne
als guten geseczt vnd in als yener gewest were daz wir alle obgeschriebn rede stucke vnd artikel also stete vnd gancz halden
wollen ane arg des zcu eyner warern sicherheit habn wir Egenante(n) Diterich von Torgow vor vns vnd vnser Erben vnß Ingesigel vnd
wir Egenante(n) Borgen Bothe von Ileborg zcu Strelle gesessen Busthe von Bygans houptman zcu mulberg Bothe von Ileborg H(er)n
wudenbrucke Hanns der Jungeste von waldenberg Albrecht von Schonburg vnd mulich von Amblingshayn auch vnß Ingesigel mit
willen vnd wissen zcu vrkunde an disen brief gehangen Der Geben ist zcu prage in der Erispery stat nach Cristes ge=
borte dreyczenhundirt Jar dar nach in dem drey vnd achtzigsten Jare an dem nesten mitwochen nach Bartholomei