WIr Albrecht von gotes gnaden Herczog ze Osterreich ze Steyr ze Kernden vnd ze Krain Graue ze Tyrol (et)c(etera) Vnd wir Elizabet von Vngern von den selben gnaden Herczoginn der vorgenant(en) lande desselben herczog Albrechts Gemahel Bekennen
vnd tun kunt offenleich mit dem brief Als vns der Allerdurchleuchtigst furst vnser lieber gnediger herr vnd vater her Sigmund Romischer zu Vngern vnd zu Behem (et)c(etera) kunig durch solicher lieb gunst vnd freuntschaft willen so er zu vns hat vnd von
sundern gnaden freymuticleich vnd wolbedachtleich geben hat das land furstentum vnd Marggraffschaft ze Merhern mit allen der selbsten Steten leutgeb(e)n gebietn dorffern klostern probsteyen lantherren manschaften Edln Rittern knechten Burgern
pawren leibgedingen Akerleutn vnd zinsen die zu dem ertreich gehoren deslen Grunden Akern gepawtn vnd vnpawtn pergen talen ebnen welden puschen werdawen waiden vischen waiden vogelaid(e)n weyern Teichen vischwaiden weingartn wassern
Wasserleuffen mulen mit perckwerchen Gold Silber pley Eysen vnd aller and(e)r perckwerch Gewelten gebieten Gerichten der selbsten landsherren auch auf des Erwirdigen des bischofs zu Olomuncz vnd sein(e)r Nachkomen gutern vnd auch auf der
andern lantherren vnd Inwoner des lands zu Merhern gutern mit gulden renten vbermassen Robatten dinsten wein(e)n vnd mit allerlay Gerubte gemainleich vnd sunderleich lehen schaften der kirchen vnd ander Gotzgaben vnd auch mit allen rechten
eren wirdikaitn nuczen gewonhaiten vnd mit allen andern zugehorungen wie die sunderleich gehaissen oder genant mugen werden nichts ausgenomen als das vormaln die Marggrauen zu Merhern seliger gedechtnuss innegehabt vnd besessen
habent In solicher mass daz wir vnd vnser leiberben ob wir die miteinande(r) haben dasselb land mit aller solicher zugehorung innhaben besiczen nuczen vnd niessen sullen vnd mugen mit vollen vnd ganczen gewelten als die dieselben Marggrauen
zu Merhern vnd kunig gehabt vnd besessen habent Doch ausgenomen des bischofs zu Olomuncz vnd herczog Priemken von Troppaw vnd ir Nachkomen die ir sin vnd der kron als ainem kunig zu Behem hat vorbehalten Doch wer es sach daz er abgieng
an leiberben das Sun weren daz denn der selb bischof vnd herczog Priemk vnd ir erben vnd Nachkomen vns(e)r Steme geben zu dem kunigreich zu Behem vnd vns des beholffen sein vnd vns auch sust in dem land zu Merhern beystendig vnd geholffen
sein vnd von In hinwider als das alles des egenant(en) vns(e)rs genedigen herren des kunigs brief den er vns daruber hat geben aigenleich ausweiset Also haben wir vns nach billicher dankperkait vnd wolbedachticleich des gen sein(e)n gnaden hinwider
verlubt vnd verpunden verluben vnd verpinden vns auch wissentleich mit kraft dicz briefs fur vns vnd vns leiberben Ob der selb vns(e)r herr der kunig in kunftigen zeiten leiberben gewunne das Sun weren vnd er oder dieselben sein leiberben das
Sun weren das vorgenant land ze Merhern mit seiner zugehorung hinwider haben wolten daz wir oder vns(e)r leiberben ob wir die miteinande(r) haben werden In des abtreten sullen vnd wellen wenn si des an vns begerent Doch ob wir oder vns(e)r
leiberben von desselben lands notdurft wegen oder solich nucz vnd rent die wir von dem selben land innemen ichtz dargelegt oder ausgeben hetten was das mit Sum brechte vnd das wir wissentleich gemachen mochten vngeuerleich darub
sol vns der egenant vns(e)r herr der kunig oder sein leiberben das Sun sind vor ee daz wir In desselben lands abtreten ausrichten vnd bezalen Ob si aber des nicht teten so sullen vnd mugen wir vnd vns(e)r leiberben dasselb land mit sein(e)r zuge
horung als vor beruret ist in phands weis da fur innhaben nuczen vnd niessen als lang vncz wir solichs darlegen ganczleich bezalt vnd ausgericht werden vnd wenn das geschiht so sullen wir In des vorgenant(en) lands zu Merhern denn abtreten an alle
waygerung vnd verziehen Doch vnuergriffenleich der vier Gesslosser Iglaw Znoym Jemnicz vnd Boberlicz die vns der egenant vns(e)r herr der kunig verschriben hat das sol bei sein(e)n kreften beleiben nach innhalung der brief die er vns daruber hat
geben Ob aber wir egenant Herczog Albrecht vor der vorgenant(en) vns(e)r Gemaheln mit dem tod abgiengen vnd nicht leiberben die wir mit ir hetten hind(e)r vns liessen so sol dasselb land mit seiner zugehorung in dem rechten als vor geschriben stet
dennoch bei vns desselben Herczog Albrechts Gemaheln beleiben wenn wir aber mit dem tod abgeen so sol es wider auf den egenant(en) vns(e)rn herren vnd vater den kunig oder sein nehst erben geuallen vnd erben Zugleicher weis ob dieselb vns(e)r Gemahel
vor vns Herczog Albrechten mit dem tod abgieng an leiberben die wir miteinande(r) hetten so sullen wir dennoch das vorgenant land zu Merhern mit sein(e)r zugehorung in dem rechten als vor geschriben stet innhaben nuczen vnd niessen vnuer
kumert wenn wir aber mit dem tod abgeen vnd dasselb land vngelost in vns(e)r gewalt belibe so sol es hinwider auf vnsern herren den kunig oder sein nehst erben geuallen vnd erben vngeuerleich Wer aber daz wir nach abgang der vorgenanten
vns(e)r Gemaheln eeleich leiberben das Sun weren bei ainer and(e)rn vns(e)r Gemaheln haben wurden vnd die nach vns(e)rm abgang hind(e)r vns liessen vnd das egen(ant) land vngelost in vns(e)r gewalt beliben were als vor berurt ist dieselben vns(e)r leiberben sullen dennoch
dasselb land ze Merhern mit sein(e)r zugehorung innhaben besiczen vnd niessen in den rechten als vor begriffen ist doch ob vns(e)r herr der kunig leiberben das Sun wern gewunne vnd dasselb land hinwider haben wolten daz sich denn dieselben vns(e)r leiberben
das Sun weren im abtreten vnd losung von dem kunig vnd sein(e)n leiberben das Sun sind haltn als vor an dem brief begriffen ist vngeuerleich Geschiht aber daz dieselben vns(e)r leiberben die wir hind(e)r vns liess(e)n
auch an leiberben abgiengen so sol das vorgenant land ze Merhern denn auch an vns(e)rn herren den kunig vnd sein erben geuallen in den rechten als vor begriffen ist an geuer Wir Herczog Albrecht vnd wir Elizabet sein Gemahel obgenant(en) sullen
vnd wellen auch dasselb land zu Merhern wenn wir das innhaben als vor berurt ist vnd all Inwoner da selbs bei allen iren gnaden freyhaiten vnd rechten haltn vnd die straussen durch Merhern gen Vngern lassen geen als bey weilent des Aller
durchleuchtigsten fursten seligen kayser karls von Rom vnd kunig ludweigs von Vngern zeiten gangen gehaltn vnd herkomen ist vngeuerleich Vns hat auch der egenant vns(e)r herr der kunig vnd vns(e)rn leiberben ob wir die miteinande(r) gewunnen vollen
vnd ganczen gewalt gegeben soliche versazte vnd verphendte Gesslosser Stet vest leut vnd gute die zu der vorgenant(en) Marggraffschaft ze Merhern gehoren vnd von sein(e)n widern oder In kunigen zu Behem oder Marggrauen zu Merhern sind versazt worden
in vns(e)r gewalt zelosen vmb die Sum darumb si versazt sind ob wir die vmb myner denn vmb die selb Summ vns(e)r gewalt bringen mochten Doch also ob es zu schulden kem daz er leiberben das Sun weren gewunne vnd dasselb land wider in sein gewalt
bringen wolte als vor berurt ist daz wir Im oder denselben sein(e)n erben denn dieselben gelosten Gesslosser Stet vesten leut vnd gute zu losen geben vmb die Sum darumb wir die gelost hetten angeuer Auch sullen vnd wellen wir dem vorgenant(en) vns(e)rm
herren dem kunig mit dem egenant(en) land ze Merhern vnd seiner zugehorung in allen sachen beystendig vnd geholffen sein gen allermeniclich niemant ausgenomen wenn vnd wieoft des durft geschiht vngeuerleich Zugleicher weis sol vns der selb vns(e)r herr der
kunig in allen sachen die dasselb land ze Merhern berurent beystendig vnd geholffen sein gen aller meniclich niemant ausgenomen wenn vnd wieoft des durft geschiht vngeuerleich Auch so hat Im der egenant vns(e)r herr kunig Sigmund die zway
Gesslosser mit namen Brumaw vnd Swietlow mit iren zugehorungen die zu dem Marggraftum vnd land zu Merhern von alters gehoren behalten zu besund(e)r liebung vnd zu seinem leib wer aber sach daz Got fur lang sey daz er an leiberben mannes geslecht
abgienge so sullen die egenant(en) Gesslos Brumaw vnd Swietlow mit allen iren zugehorungen ledicleich an vns vnd vns(e)r erben geuallen in aller mass als wir das egenant Marggraftum vnd land innhaben Vnd des zu vrkunt geben wir den brief mit
vnsern angehangen Ingsigeln besigeltn Der geben ist zu Ofen an Suntag nach Sant Michels tag Nach kristi gepurde vierzehenhundert Iar Darnach in dem Drew vnd zwainczigsten Iare