Wir Sigmund von gotes gnaden Romischer keyser zuallenzeiten Merer des Reichs vnd zu Hungern zu Bohem Dal
macien Croacien (et)c(etera) kunig Bekennen vnd tun kunt offenbare mit disem brieff allen den die In sehen oder horen lesen Das vns vnsere liebe
getruen die Ratman der Stat zu Gorlicz durch Ir Erber botschafft haben furbringen lassen Wie Sy in Irer Stat ein gewonheit haben vnd
sey ouch also herkomen so man schedliche leutte verderben sol vnd die sachen Ires verdienens vnd misshandlung in Irem Rate mitsampt vnserem
Richter daselbs erkant vnd beslossen werden daz man dann solich vervrteylte leutt erst zum andern mal fur gehegte bank furen musz daz dann
denselben Richter vnd Rathmannen bekumerlich vnd mit zwyfacher arbeytt zugee vnd ouch daz das gericht dadurch manigmal sich lenge vnd
verziehe Vnd haben vns bitten lassen diemuticlich Sy dorynn gnediclich zuuersorgen damit solich Gericht dester furderlicher volfuret werde
Des haben wir angesehen der egenan(ten) von Gorlicz flissige bete vnd ouch Ir true dienste vnd vestikeit dorynn Sy gen vnser Maiestat alzit vnuer
drossen erfunden werden vnd ouch gemercket furderung des Gerichts vnd haben dorumb mit wolbedachtem mute gutem Rat vnser getruen
vnd rechter wissen den egenant(en) von Gorlicz vnd Iren nachkomen dise besonder gnad getan vnd In erlaube(n) tun vnd erlaube(n) In ouch in crafft
disz brieffs von kuniglicher Macht zu behem also So furbasz Sy in Irem Rate mitsampt vnserm oder vnser nachkomen Richter solich schedlich leutt
vrteyln vnd vber Sy erkennen vnd besliessen nach Irer gewissen vnd vff Ire eyde nach eins yglichen vbeltetigen misshandeln vnd verdienen das
man dann solich leutte nit sol noch bedarff zufuren fur gehegte bank sunder Sy mogen zu dem oder den richten lassen on alle sawmnusz vnd
hindernusz nach dem vnd Sy dann mit vnserm Richter in Irem Rat erkennen vff Ire eyd als vorgeschriben steet Vnd damit sollen Sy gegen vns
vnd die Cron zu behem noch gen nyemands gefreuelt haben Mit vrkund disz brieffs versigelt mit vnser keyserlichen Maiestat Insigel
Geben zu Vlme nach Cristi geburt vierczehenhundert Iar vnd dornach Im vieronddrissigisten Iare am dinstag vor sant Marie Magdalenentag
vnser Reiche des vngrischen (et)c(etera) Im Achtvndfiertzigisten des Romischen Im xxiiii des Behemischen Im xiiii vnd des keysertumbs Im andern Iar

Ad mandat(um) domi(ni) Imperatoris