Wir Sigmund von gots gnaden Romischer keiser zu allencziten Merer des Richs vnd zu Hungern zu Behem Dalmacien
Croatien (et)c(etera) kunig Bekennen vnd tun kund offenmbar mit disem briefe allen den die jn sehen oder horen lesen Wann ycz Jencko
malerfleck vnser Burggraue zu Bertemberg vnser lieber getreuer mit der erberen Margrethen ettwann hannsen forsters der dann
vorcziten ein pfleger zu Eger was witiben vnser lieben andechtigen vmb soliche geltschulde so dann demselben ettwann hannsen
jrem Manne jr vnd jrer beider erben oder wer die briefe daruber gemachet mit jrem gutem willen ynnehete von vnserm bru
der vnd vorfaren seligen kunig wenczlauen vff vnser pflege zu Eger verschriben was vnd vmb die briue daruber gegeben die dann
ynnehielten vierhalbhundert schock behemischer grossen vmb eine genante Summen gelts gutlichen vberkomen ist vnd derselben
Margreten darfur ein genugen getan also daz sie jm dieselben schuldbriefe vber die vierhalbhundert schock grossen jm williclich(e)n
vbergeben vnd derselb Jencko die egenanten briue furter zu vnsern handen gewant hat Darumb demselben Jenckon zu einer wider
stattung dorvmb tutunde so hann wir fur vns vnser erben vnd nachkomen kunige zu Behemen demselben Jenckon vnd seinen
erben vff das egenant vnser Sloss Bertemberg saine pflege vnd zu gehorunge zu dem vorigem gelde das dann jm vnd sinen
erben von vnsern vorfaren vnd der Cron zu Behem vff dem egenanten Slosse vnd pflege verschriben ist vnd die briue daruber
gegeben ynnehalden bewid geslagen vnd verschriben slahen vnd verschreiben jm vnd seinen erben daruff von Behemischer ku
niglicher macht in crafft disz briefs funfhundert Rynsche gulden also das derselb Jencko vnd sine erben oder wer disen brieff
mit seinem oder derselben seiner erben guten willen ynnehat das obgenant vnser Sloss Bertemberg mit siner pflege vnd
zugehorunge ynnehaben besiczen vnd des nuczen vnd niessen sullen vnd mugen als lange bisz das wir vnser erben oder nachko
men kunige zu Beheim das obgenant Sloss vnd pflege widerumb von jm seinen erben oder wer disen briefe mit sinem
oder jrem willen als vor gerurt ist ynnehat vnd die egenanten funfhundert gulden vnd auch die Summen als jm vorhin
daruff verschriben ist ledigen vnd losen Mit vrkund disz briefs versigelt mit vnserer keyserlichen Maiestat Jnsigel Geben zu
Regenspurk Nach crist geburd vierzehenhundert jar dornach in dem vierunddryssigstem Jare am nechsten freitag nach Sand
Michels tag Vnsers Richs des hungrischen (et)c(etera) jm achtvndzweinzigstem des Romischen jm funfvndzweinzigstem des Behem
yschen jm funfzehendem vnd des keysertumbs in dem andern Jaren