Wir Sigmund von gotes gnaden Romischer keyser zuallenzeiten merer des Reichs vnd zu Vngern zu
Behem dalmacien Croacien (et)c(etera) kunig Embieten vnsern lieben getruen allen vnd yglichen mannen der land zu Glatz
vnd ffranckenstein vnser gnad vnd alles gut lieben getruen Als wir vor ettlichen zeiten dem edeln puothen von Czas
tolowicz vnserm lieben getruen vnsere land zu Glatz vnd zu ffranckenstein verschriben vnd euch dabey geboten haben jm ge
wertig vnd gehorsam zusein Also vernemen wir das ettlich vnder euch sich widern jm soliche gehorsamkeyt die vns vnd
jm an vnser stat geburt zutun vnd zubeweysen vnd meynen jn nicht zuhalden als sich dann geburt das vns nicht lieb
sunder gantz wider ist vnd wann wir nu vnsere gerechtikeyt vnd gehorsam nicht meynen abzugeen lassen dorumb
so ist vnsere meynug das jr dem egen(anten) puothen gelobet an vnser stat gehorsam vnd gewertig zusein vnd alle dinck zutun
als wir selber da weren So lang vnd wir oder vnser nachkomen dieselbn lannd von jm oder seinen erben nicht lozen vnd tut
dorvnn nicht anders bey vnser hulden Geben zu Regenspurg versigelt mit vnser keyserlichen maiestat Jnsigel nach Cristi
geburt vierczehenhundert jar vnd dornach in dem vieronddrissigisten jare am freytag nach sant michels tag vnser riche des
vngrischen (et)c(etera) in dem Acht vnd vierczigisten des Romischen jm xxv des behemischen jm xv vnd des keysertumbs jm and(er)n jaren
Ad mandatum domini Jmperatoris
Caspar Slik miles Cancellarius