Wir Albrecht von gotes gnaden Romischer kung zu allencziten Merer des Reichs vnd zu hungern zu Behem Dalmacie
Croacien etc(etera) kunig vnd herczog zu Osterreich Bekennen vnd tun kunt offenbar mit disem brieff allen den die jn sehen oder horen lesen Das
fur vns komen ist die hochgeborne Elizabeth herczogynn jn Slesien vnd zum Brige vnd zu lignig vnser liebe mume vnd furstynn vnd bracht vns fur
einen versigelten brieff des hochgebornen ludwigs herczogen jn Slesien herren zu Brige vnd zu lignig dorynn er seinen vnd jrer baider elichen Tochtern
den hochgebornen furstynn Magdalenen vnd hedwigen jglicher Czehen Tausent Schock Behemischer grossen zu jrer bestattung vff seinen landen vnd Steten zu
Brige zu lignig vnd Bolikert gegeben vnd verschriben hatt vnd dieselbe Elizabeth hat vns mit demutigem fleisse gebeten das wir als ein kunig zu Behem
zu solicher gabe vnd verschribung vnsern kuniglichen willen vnd gunst zugeben vnd denselben jren Tochtern Magdalenen vnd hedwigen jr jglicher soliche
czehen Tausent Schock grossen vnd gabe vnd verschribung vnd den brieff doruber gegeben zubestetigen vnd zuconfirmieren genediclich geruchten Des
haben wir angesehen der vorgenan(ten) Elizabethen fleissige demutige bete vnd ouch gancz truwe die Sy vns vnd vnser Crone zu Behem offte vnd dicke
beweist vnd getan hat vnd furbas zutund willig ist ouch angesehen willige getrue dienste die der obgen(ant) herczog ludwig vnsern vorfarn vnd der Crone
zu Behem offte mit stetigem fleisse getan hat Darumb vff das das sine egenan(ten) Tochtere jn wirdiger eren zunemen vnd bliben So haben wir mit
wolbedachtem mute gutem Rate vnser fursten Edeln vnd getruen zu der vorberurten gabe vnd verschreibung vnsern kuniglichen gunst vnd willen gnedi
clich gegeben vnd den egenan(ten) Magdalenen vnd hedwigen soliche jres vatters herczog ludwigs gabe vnd verschreibung jglicher Czehen Tausent Schock
Behemischer grossen vnd den brieff doruber lautende bestetigt vnd confirmieret Bestetigen vnd confirmieren sy hie jn krafft dis briefs vnd kunigli
cher macht zu Behem was wir sy dann von Recht wegen doran bestetigen vnd confirmieren solden vnd mochten Mit vrkund diß briefs versigelt mit
vnserm kuniglichen anhangend(en) jnsigel Geben zu Bresslaw Nach Cristi gepurd vierczehenhundert Jar vnd dornach jn dem Achtonddreissigste Jare
An sandt Barbaren der heiligen Jungkfrawen tag Vnser Reiche Jm Ersten Jare