Wir friderich von gotes gnaden des heiligen Romischen Riches Erczmarschalk Herczoge czu Sachsen lantgraue Indoringen vnd marggraue czu
Meissen Bekennen vor vns vnsern lieben bruder Herczogen Wilhelmen vnd thun kund offinbar mit dissem briue gen allermenniclichen die
yn sehen horen ader lesin Nach dem vnd als wir fur etlichen Jaren mit dem Edeln ern Hansen von Coldicz vmb allen vnbillen spenne vnd
stosse die vff dasmal czwisschen vns vnsern landen vnd ym entsprossen vnd entstanden waren gutlich sind voreynet vnd vorsunet worden
nach clerlicher besagunge der briue von vns beidersit doruber ym Jare vnddrissigsten Jare der mynner czal am fritage nach pfingsten
gegeben vnd dornach wider mit ym czu vnbillen czwitracht spennen vnd stossen komen sind das vff hute mittelwochen Bonifacij der Edel
er Thymo von Coldicz sin vetter vnd der Gestreuge er Apel vitzthumb Ritter vnnser Heymlicher Rat vnd liber getruwer vns mit dem
gnanten ern Hansen vmb alle vnd igliche solliche vnbillen czwitracht spenne stosse vnd geschefft die sich die czwisschen vns vnnsrn
landen vnd luten vnd ym vnd allen den sinen biß vff dissen hutigen tag erhaben gemacht vnd vorlouffen mit vnnser beider wissen vnd
willen gutlich vnd fruntlichen eynt vnd sunet haben der eynander in ewigen geczyten nymer czugedencken anczfeen ader offczuhebn
So das doruff die vorberurten Sune briue sollen machteloß sin vnd ubergeben werden vnd aller vnbille czwisschen vns von beidersit gantz
abe vnd eyne rechte sune vnd richtunge czu ewigen geczyten sin vnd bliben doch also ab wir ader die vnnsrn der wir vngeuerlichen
mechtig weren hirnach mit ym wider czu vnbillen komen wurden So sollen wir vns an gelegene stete mit ym betagen vnd czwene
vnnser Rete ader manne vnd der gnante er Hans auch czwene siner frunde dorczu schicken vns dorumb gutlichen czuuerfugen mocht
sichs aber also nicht finden vnd dorumb czu fehden mit dem obgnanten ern Hansen komen musten So wollen wir vns des gen ym
erberlichen mit vnnsern offen schrifften bewarn vnd noch der bewarunge eyn gancz vierteil Jares an yn vnd den sinen nicht griffen
noch beschedigen lassen Wurde auch eyn konig ader die krone czu Behemen hirnach mit vns czu fehden komen So mag sich der
gnante er Hans des gen vns bewarn vnd vier wochen noch der bewarunge sich auch yn solliche fehde czihen vnd sal domitt In disser
sune keyne vorbrechen haben Solliche sune vnd richtunge reden wir eynander Herczog friderich fur vns vnsern lieben bruder Herczogen
Wilhelmen vnnser beider lande vnd lute der wir vngeuerlich mechtig sind In allen iren puncten stucken vnd artikeln bie vnnsern
furstlichen worten gancz stete vnd feste vnvorruckt czuhalden ane alle argelist vnd geuerde Des czu vrkunde haben wir vnnser Ingesigel
an dissen briff wissentlichen lassen hengen der gebin ist czu friberg nach cristi geburt vierczenhundert dornach ym dryvndvirczigsten
Jaren am mittelwochen Bonifacij