Wir Lassa(w) von gots gnaden zu Hungern zu Behem Dalmacien Croacien (etc.) kunig hertzog zu Oster=
reich vnd Marggraue zu Merhern (etc.) Bekennen vnd tun kunt allermeniclich daz fur vns komen ist der
Strenge Ritter niclas Truchsess vnser hofmarschalk vnd lieber getrewer vnd hat vns mit vleis gebeten
daz wir Jm vnd seinen erben eynen vnsers lieben herren vnd vatter kunig Albrechts loblicher gedechtnus
brief vber das Sloss Sternitz in vns(er)m Marggraftum zu Merh(e)n gelegen lautende gnediglich geruchten
zu bestetigen vnd von newes zugeben haben wir angesehen des obgenann(ten) niclasen vleissige bete auch
betracht sein willig vnd vleissig dinst die er vns(er)m vorgenann(ten) herrn vnd vatter getan hat vnd vns
teglich tut vnd in kunfftigen tzeiten tun sol vnd mag vnd haben darumb mit wolbedachtem mut gutem
rat vnd rechter wissen dem bemelten niclasen vnd seynen erben den vorgenann(ten) vnsers lieben h(er)r(e)n vnd
vatters kunig Albrechts brief gnediglich confirmirt vnd bestetiget vnd geben Jn auch das obgenann(te)
Sloss Sternitz von newes erblich von Behemischer kuniglicher macht vnd als ein Marggraue zu Merh(e)n
mit allen freiheiten rechten zinsen Rennten nutzen gulten vnd zugehorungen nichts aussgenomen Also daz
er vnd sein erben das obgenann(te) Sloss nu furbaser vns Jnnhaben besitzen gebrauchen vnd geniessen
sollen von allermeniclich vngehindert Mit vrkunt ditz briefs versigelt mit vns(er)m kuniglichen anhan
gunden Jnsigel Geben zu Wienn an freitag vor sand lucien tag Nach Cristi gepurt viertzehenhundert
vnd im funffundfunfftzigisten Jare Vnser(e)r Reich des hungrischen (etc.) im Sechtzehenden des Behe
mischen im dritten Jaren