Irey von gotes genaden kunig zu
Behem Marggraue zu Merhern e(t)c(etera)

hochgeborne liebe Mume Nach dem etlich brief von Rom zu uns kumen der fast villeicht nit dem
inhalt euch sund(er)porgn sindt Aber wir habn ein gantz getrauen ir werdt ew(er) ere bedenckn und
euch mit ewrn undertan(en) aufrichtigleich zu unns und unns(er) kron haltn, wan wir abgotwil mit
Rate unnsers h(er)rn des keysers und ander fursten unns(er) freunde deßgleichen mitsampt unns(er)n Retn unns(er)
sach fursetzn und zu eim redlichen ende bringn wolln und wer sich also gein unns als eim künig
untertan wie ansteet und gepuret haltn wirdt gein dem wolln wirs genedigleich bedenckn wirdt
sich aber yemandt darinn uersehn des wir unns nit u(er)sehn was es im an seim eren und gut glimpf
und frume bringn wirdt er wol findn darnach mugt ir euch mitsampt ewrn undertan(en) wissn zu
richtn wan ir mugt wol besinn(en) was am Rein und anderswa durch solh sach geschegn ist Wir
sind aber zweifels frey ir werdet ew(er) Ayde Trew und pflicht domit ir unns und unns(er) kron mit
sampt ewrn undertan(en) u(er)pundn seyt betrachtn und euch mit den ewrn gein unns haltn als sich
ew(er) voruardn gein unns(er)n voruardn und der kron bewisn habn Das wir dan gein euch
und den ewrn in vleiss genedigleichn erkenne(n) wolln Gebn zu Prag am Montag vor unns(er)s
h(er)rn leichnams tag Unnsers Reichs im Sechsten Jare

Ad mandatu(m) d(omi)ni
Regis m(a)g(ist)r(o) p(ro)p(r)ia