Wir Jeronimus, Laurenc, Caspar, Mauritz vnnd Hainrich gebrüeder vnd geuettern die Schlicken Grauen zu Passaw vnnd herren zu Weisskirchen
Bekhennen offennntlich mit disem brieff vor meniglich: Als wir von dem allerdurchleuchtigisten, großmechtigisten fürsten vnd herren, herren Ferdinanden, Römi
schen, auch zu Hungern, Behaim ic. künig, Infanten in Hispanien, Ertzhertzogen zu Osterreich, hertzogen zu Burgundi, zu Lützemburg vnnd in Slesien, Marg
grafen zu Merhern vnd Lausitz, Grauen zu Tirol ic. in der hanndlung vnnd Irrunng, so sich in verschinung Irer Mayestat gepürenden einkomen vnnd
nutzung bey dem Joachimsstallyschen pockhwerch Jüngst hieuor zugetragen, vnd begeben etlichs vngepürlichs schreiben vnd Reden, als hetten wir bey Irer
Mayestat Rechtenn vil betheuren mügen, gethan, Darauf vnns dann Ir kün(igliche) M(ajesta)t derselben vnd annderer mer vrsachen halben, vermüg des vrthels derhalben
ergangen, in Ir M(ajesta)t straf vnd vnnngnad genemen. Vnd wiewol die hochgedacht kün(igliche) M(ajesta)t mit weitter vnd strennglicher straf, weder Ir M(ajesta)t fürgenomen,
gegen vnns zu hanndlen füeg vnd Recht gehabt, So haben doch Ir kün(igliche) M(ajesta)t auf der allerdurchleuchtigisten fürstin vnd frawen, frawen Anna, Römischer,
Hungerischer vnd Behamischer künigin ic. derselben liebsten Gemahel, vnnserr allergnedigisten frawen, vnd des durchleuchtigisten fürsten vnd herren,
herren Maximilian, Ertzhertzogen zu Osterreich ic. Irer M(ajesta)t geliebten Son, vnd etlicher annderer gaistlicher vnnd Weltlicher fürsten, auch derselben landts
Ambtleut, offner, Erblicher, herren vnd Rytterlicher Rät, der Cron Behaim, vnd derselben Inwoner, in den Lannden, hoch vnnd vleissig fürpit, auch auf
vnnser diemüetig ansuechen vnd pit, aus gnaden vnns zu gnediger straf khomen lassen, Darümb wir auch der kün(iglichen) M(ajesta)t vnnderthänigist danckh sagen,
dann vnns von Irer kün(iglichen) M(ajesta)t wider vnnd ausser Recht, mit gewalt, vor noch Jetz, nichts begegennt, noch von Irer M(ajesta)t nichts fürgenomen, noch geschecht,
worden, des Ir M(ajesta)t nicht gueten füeg vnd Recht gehabt hetten, Sonnder das wir Ie vnd albeg zu gebürlichem Rechten gelassen, vnnd darinn durch Ir M(ajesta)t
nie verhinderdt worden sein. Wir haben auch für vnns, vnnser Erben vnd nachkhomen gelobt vnd versprochen, geloben vnd versprechen auch hie
mit bey vnnsern Eeren vnd trewen, an ayds stat, wissentlich, wolbedächtlich vnd in crafft diß brieffs, das wir gegen der hochgedachten Römischen, Hun
gerischen vnd Behamischen kün(iglichen) M(ajesta)t, derselben Erben vnd nachkhomen, auch Irer kün(iglichen) M(ajesta)t künigreichen, Lannden vnd leuten, an allenn denen, so in der sachen
verdacht oder verwonnt sein, der vnnngnad vnd straf halben, darein vnns Ir M(ajesta)t genemen, vnd was sich daraus oder daründer begeben vnd zugetragen hat,
für vnns selbs, vnnser Erben vnd nachkhomen, weder mit werckhen noch worten, nichts annden, noch äffern, auch derhalben khain shaden noch nachtail, weder
haimblich noch offennntlich, nicht züefüegen, auch darümb, en durch vnns selbs, noch durch anndere, zu hochgedachter kün(iglichen) M(ajesta)t, derselben Erben, nachkhomen, landten,
Leutten, noch zu Iemandts annderm, nichts zu sprechen, haben, auch den vnnsrn solichs züethuen nit gestatten sollen noch wellen, In khainerlay weg noch
weiß. Theten wir aber das nicht, vnd dise verschreibung in ainem oder mer artickeln vberfüeren, So sollen wir darümb für vnleumbig gehalten, vnd als die
so wider Ir ayd, brief vnnd Sigel gethan haben, on alle genad gestrafft werden. Des zu vrkhundt haben wir dise vnnser verschreibung mit freyem, guetten
willen, vnd vnbetzwungenlich, vnnder vnnsern hieran hangennden Insiglen, vnd hanndten, vndershriben, verfertigt. Vnd von merer sicherhait wegen,
mit vleis erpetten, die wolgebornnen herren, herren Zdislawen Bercka von der daub vnd Leip, auf Reichstat, der Cron Behaim obristen Lanndhofmaister, vnd
Lannduogt in ober Lausitz, vnd herren Jan den Eltern von Lobkowitz, auf Zbyroh, der Cron Behaim obristen Lanndrichter, herren Jan den Jüngern von Lob
kowitz, auf debrehoßt, Tein, kün(iglicher) M(ajesta)t in der Cron Behaim Teütschen Lehennshauptman, vnd die Edlen, gestrenngen, Etten, herren Ihan Behem von Lasian, auf
pitzin, obristen Lanndtschreiber der Cron Behaim, Sebastian Markhwart von Hradec, auf nekmirz, Burggrauen zum karlstain, das Sy Ire Insigl zu gezeügnüß
doch Inen vnd Iren Erben on shaden, neben vnnser hierangehenngt. Des wir obgedacht Zdislaw Berka, Ihan der Elter, vnd Ihan der Jünger von Lobkowitz, Ihan
Behem, vnd Sebastian Markhwart, Bekhennen, das wir auf pit obberüerter herren Schlicken, vnnser Insigel wissentlich hierangehenngt, doch vnns
vnd vnnsern Erben on shaden. Geben vnnd beschehen am neüntzehennden tag des Monats Septembris, Im fünfftzehenn hunndert, fünffvndviertzigisten
Jar.
Jeronimus Schlyk graf
meynhant
Lorenz Schlik graff
mein hant schrifft
Caspar Schlick
graff mit aigner
hant
Mauritz Schlick
graff vnnd herr
mein hant schrifft
Hainrich Schlick
graff vnnd herr
mein hant schrifft