NOS PHILIPPVS Dei benignitate Princeps Hispaniarum, Archidux Austriae, Dux Burgundiae etc(etera) Comes Habspurgi Flandriae etc(etera)
Recognoscimus et notum facimus tenore praesentium vniuersis. Quod quum Serenissimus Princeps Dominus Ferdinandus, Romanorum, Hungariae, Bohemiae etc(etera)
Rex Archidux Austriae, Dux Burgundiae, et Comes Habspurgi etc(etera) Patruus noster charissimus, pro illustrando et ornando matrimonio, inter Serenissimum
Principem Dominum Maximilianum Archiducem Austriae, Ducem Burgundiae, et Comitem Tyrolis etc(etera) fratrem et sororium nostrum charissimum, et
Serenissimam Principem Dominam Mariam Infantem Hispaniarum, sororem nostram charissimam, sufficienti dispensatione a sede Apostolica desuper ob=
tenta (quod vniuersae Christianitati foelix et faustum esse Deus faxit) foeliciter concluso et stabilito, eidem Serenissimo Archiduci Maximiliano clementer et pa=
terne annuerit et consenserit, quod in Regem Regni Bohemiae coronari valeat et debeat, tituloq(ue) Regis Bohemiae, honoris gratia, tam in scribendo, quam alias
pro ipsius voluntate, veluti futurus legitimus haeres et Rex eiusdem Regni, ratione primogeniturae, vti possit, hac tamen adiecta et apposita lege, et conditione
vt praenominatus Serenissimus Archidux, se in administrationem et Regimen dicti Regni Bohemiae, quamdiu praefatus Serenissimus Dominus Rex
Dilectionis suae Pater vixerit, nullatenus directe vel indirecte intromittere seu ingerere debeat, sine eiusdem expresso consensu, voluntate, et iussu. Et si contra
fecerit, amittat non solum praedictum concessum Titulum, sed etiam Ius succedendi in dicto Regno, omneq(ue) aliud Ius, quod sibi in et ad dictum Regnum competit,
seu quomodolibet competere posset in futurum, Et quod ista teneatur etiam ratificare coram Statibus et Ordinibus Regni praefati Bohemiae, prout hac in literis
vtrinq(ue) desuper expeditis latius continentur, atq(ue) etiam per Sacratissimam Caesaream, et Catholicam Regiam Maiestatem, Dominum et Patrem nostrum
colendissimum, specialibus Maiestatis suae literis interpositate authoritate sua roborantur, et dictus Serenissimus Archidux, ad praemissorum inuiolabilem
obseruationem obligatur Idcirco nos quoq(ue) praedicta omnia rata et grata habere volentes, promittimus in verbo Principis, quod contra ea, vel eorum aliquod
nullo modo faciemus, sed potius omnibus modis, vijs, et rationibus, bona fide et syncere promouere, vt saepedictus Serenissimus Archidux praedicta omnia
firmiter et inuiolabiliter obseruet. Harum testimonio literarum, quas manu nostra propria subscriptas, et sigilli nostri appensione communiri fecimus.
Dat(um) in Oppido Bruxellen(si) Ducatus Brabantiae Die altero Mensis Maij. Anno Domini Millesimo Quingentesimo, Quadragesimo nono.
Philipp(us)
Ad mandatum suę celsitudinis
proprium. Gonsalus Perezius