Wir Ferdinand der Dritte von Gottes gnaden Erwehlter Romischer Kaiser
Zu Allen zeitten Mehrer des Reichs in Germanien zu Hungarn Beheimb Dalmatien Croatien vnd Sclauonien (etc) Konig Ertzhertzog zu Osterreich Hertzog zu Burgundi zu Brabandt zu
Steyer, Karndten, zu Crain, zu Luxemburg, zu Wurttemberg, Ober vnd Nider Schlesien, Furst zu Schwaben, Marggraff deß Heiligen Romischen Reichs zu Burgau, zu Mähren, Ober vnd Nider Laußnitz, Gefurster Graff zu Habspurg, zu Tyrol, zu
Pfirt, zu Kyburg vnd zu Görtz, Landtgraff in Elsaß, Herr auff der Windischen Marck, zu Portenau, vnd zu Salins. Bekennen vnd thun kundt Vor Jedermenniglich, Als daß bey vnß Franciscus Niclas
Brixel Von Brixelberg, gehorsambst anbringen vnd gebetten, Demnach Ihme nach außweißung vnserer behaimischen Landtsordnung, an Vollkommenheit seiner Vogtbarkeit, noch eine Zeit abgienge, die deßfalß allergnedigst Ihn
zu eximiren Vnd Ihme solchen abgang seiner Vogtbaren Alters auß Kayser(lichen) vnd Koniglicher Macht zu Supplirn allergnedigst geruhen wolten. Wann wir dann gnedigst angesehen solche seine demuhtigste bitt, auch seine
Sonst in vnsern geruhenden gueten Qualiteten, Zuegesehen auch deß Zuefallung seiner Vatter, erlangung des Konig(reichs), Daß gerue wir darinn in Kayser(lichen) vnd Koniglichen gnaden, Vnd dießemnach Ihme sein Vollkommen Jahr gnedigst
erteylt, Thuen solches auch Vnd ertheillen dasselbe auß Vollkommenheit, Vnnserer Kayser(lichen) Vnd Koniglicher Macht, in Krafft dießes Brieffs, wißentlich, Vnd mit guetem bedacht, Also Vnd dergestalt, daß
er sich nit allein der Verwaltung seiner Gietter, Sondern auch aller andern geziemenden handlungen, negotien Vnd geschefft, dermassen alß ob er seiner Vatter, Vnd in mehrangeregter vnserer behaimischen Landtsordnung
Außgesetzte Vollkommen Jahr Völlig erraichet hette, Vnderfangen, Vnd derselben Empfahendt theilhaftig sein vnd möge, gestalt wir Ihm auch alle die Jenigen defectus, so Ihme deß Alters halber eingewendet werden mochten
hin auß Kayser(lichen) Vnd Koniglicher Macht Vnd Vollkommenheit, gäntzlich Supplirt Vnd erfullet haben wollen. Dagegen Versehen wir Vnß zu Ihm Francisco Niclas Brixel gnedigst, er werde vnsern Ihme erzaigte gnad
Jederzeit anietzig erkennen, sich derselben erfreuen, Vnd seine sachen also anstellen werde, auff daß wir Vrsach haben mochten, Ihme mit mehrern Kayser(lichen) Vnd Koniglichen gnaden Zuebedencken. Gebietten
hierauff allen Vnd Jeden Vnserm Vnderthanen, waß wurdten Standts Ambts oder Wesens die sein hiemit gnedigst Vnd Ernstlich, Vnd wollen daß sie mehrbenandten Franciscum Niclas Brixel, bey dießer Vnserm Ihme
Conferirten eximierung Vnd Verleihung des Vollkommen Jahr Ruhiglich bleiben, Vnd sich derselben wurcklich gebrauchen lassen, Ihm daran nicht hindern, noch andern solches Zuthuen Verstatten, bey Vermeidung Vn
serer schweren Straff Vnd Vngnad. Zu Vrkundt diß Brieffs besigelt mit Vnserm Kayser(lichen) Vnd Koniglichen anhangenden grossen Insigel, Der geben ist auff Vnserm Koniglichen Schloß Zu Prag den Vierdten
Monatstag Junij im Sechtzehenhundert Siben Vnd dreissigsten, Vnsers Reichs deß Romischen im Ersten, deß Hungarischen im Zwölfften Vnd deß Behaimischen im Zehenden
Jhar.

Guilielmus Comes Slauata
R(egni) Boh(emiae) S(upremus) Cancellarius

Albrecht von Kolowratt