Wir Rudolph der Jung(e) und Otte von gotes gnaden hertzogen ze Sachssen bekenn(en) und tun kunt offenlich mit disem brief alln den di in sehn horen oder lesen. Wann
der allerdurchleuchtigster furste und unser genedig(er) herre her Karl Romisch(er) kunig ze alln zeiten mer(er) des Reichs und kunig ze Beheim von den Erwirdig(e)n
fursten und herren hern Baldewin Erczbischof ze Trier her Gerlach Erczbischof ze Mecz her Walram Erczbischof ze Coln und den hochgebornen fursten hern Jo
hansen selig(er) gedechtnuzz ettwan kunge ze Beheim her Rudolfe h(er)tzogen ze Sachssen uns(er)m liebn herren und vater und her Waldemar Marggraven ze Brandemburch
und ze landssperg uns(er)m liebn oheim ze Romisch(e)m kunge recht und redlich und einmuetichlich erwelt und irkoren ist. Darumb verbinden wir uns unser erbn
und nachkomen hertzog(e)n ze Sachssen mit dem vorgenant(e)n uns(er)m herren dem Romisch(e)n kunge und kunge ze Beheim als mit eynem kunge ze Beheim un(d) des
Reichs kurfursten seinen erbn und nachkomen an der selbn kur kungen ze Beheim und mit den vorgenant(e)n Erwirdig(e)n kurfursten und herren geistlich(e)n
und werntlich(e)n und mit alln and(er)n fursten Graven vreyen herren und stetten di dem vorgenan(ten) uns(er)m herren dem Romisch(e)n kunge gehorsam und
und(er)tenig sein und di in den selbn schirmtuzz sten und bleibn welln. Und gelobn mit guten treuen an geverde an eydes stat das wir mit den vor
genant(e)n fursten und si mit uns den vorgenant(e)n uns(er)m h(er)ren dem Romisch(e)n kunge und unser ytclicher dem and(er)n umb des vorgenan(ten) Romisch(e)n Reichs
und unser kurfurstlich(e)n Recht ere und wirde zebehalden und ze behalden beholfen und beratan sein welln mit leib und mit gut und mit allir
macht wid(er) allirmennigleich und sunderlich(e)n wid(er) Graven Guntheren von Swarczburch der sich des Reichs vrevelich(e)n und ze unrecht wid(er)
uns(er)n herren den vorgenan(ten) und wid(er) den stul ze Rome wid(er) uns(er) und des Reichs recht angenomen hat und annymet und wid(er) alle
sein helfer und gunner di er hat oder noch gewunnen mag unser herre her Karl der Romisch(e) kunig sei lebende oder tod wann wir des billich
und ze rechte teten pflichtig sein also und wir der stymmen und der kur di eyn hertzog ze Sachssen hat an der wal eyns Romisch(e)n kunges von er
denlich(e)m und recht(e)m anevalle wartende sein noch tode des hochgebornen fursten und h(er)ren hern Rudolphs hertzog(e)n ze Sachssen uns(er)s liebn vat(er)s
der vorgenan(ten) den got genade zebehalden und bynamen gelobn wir mit den vorgenan(ten) kurfursten und and(er)n fursten Graven herren und stetten
als vorgeschribn stet das wir wed(er) den vorgenan(ten) Graven Gunther noch nymand and(er)s wa er genant sei er sei geborn oder unwide geborn
der uns(er)s vorgenant(e)n herren lebn und wid(er) in der sich des Reichs angenomen hat oder annymet auf geruckt ist oder auf geruckt wirt
uns(er) vorgenan(ten) herre sei lebende oder tod od(er) wa er fust von dem Reich hette des got nicht enwelle eynen Romisch(e)n kunig halden welln
noch sulln noch in zu dem Reich newm(er) kiesen oder uns(er) kur an in wenden ob es ze schulden kumpt. Ouch gelobn wir wer das ymand ey
ner oder mer wem eyn(er) dem vorgenant(e)n graven Gunther oder eynem and(er)n der zu kunge auf geruckt wurde behulfen weren
und in eynen kunig halden und im helfen welden das wir des und der selbn offenber vynde sein welln und uns mit den selbn nymer
und(er)sten noch sunen es sei denne das si den selbn aufgeruckten kunig allir sach(e)n begebn und bei uns gelobn vestetich zebleibn. Darnach gelobn
wir mit guten treuen an eydes stat als vorgeschribn stet das wir in dise ob(er)menung eydt und gelubde bringen und nemen welln alle
di fursten bischove stift(e) capitel Graven herren vreyen dinstmann stette und and(er) leute so wir allirmeist mugen di alle dise vorge
nant(e)n stucke sweren stetigen und gelobn sulln gancz stete und unzubrocken zebehalden und darumb ze gebn ir sunderlich(e)n
briefe. Ouch gelobn wir fur uns uns(er) erbn und nachkomen hertzog(e)n ze Sachssen mit guten treuen an eydes stat das wir alle
di vorgenant(e)n stucke in allir meynung als vor geschribn stet gancz und unverrukket haldn und halden welln und da wi
der nicht teten noch da wid(er) ze komen heymelich(e)n od(er) offenber in dheinenweis. Mit urkund ditz briefs der besigelt
ist mit uns(er)m des vorgenant(e)n Rudolphs des Jung(er)n hertzog(e)n ze Sachssen Ingesigel und wir hertzog Otte der egnant(e)
wann wir eygens Ingesigels ze disem mal nicht anhabn so vericht wir alle dise vorgenant(e)n rede und(er) dem Inge
sigel hertzog(e)n Rudolphs uns(er)s brud(er)s des vorgenant(e)n. Gebn ze Coln an dem Reyn do man zalte nach Cristus ge
burth drewzehnhundert und Neun und fierczig Jar an dem nehsten dinstag nach sand Valentins tag.