Wir fridrich Balthazar. Ludwig vnd Wilhelm gebruder von gots gnaden Margrauen zeu diringen. Margrauen zeu Meyssen in dem
osterland vnd zeu Landsperg burcgrauen zeu orlamund. vnd herren des lands zeu pleyssen. Bekennen offenlichen an disem gaint
tigen briue. vn(d) tun kunt alln den. die in sehn. horen. od(er) lesen. Daz wir dem allerdurchleuchtigsten fursten. vnd vns(er)m gnedigen herren
herren karl. Romischem kunig. zeu alln zeiten merer des reichs. vn(d) kunig. zeu Beheim. vnd den hochgeborn fursten. vn(d) herren. Johans
Margrauen zeu Mehern. vn(d) wenczelawe seinen bruder. iren. erbn. vnd nachkumen kunigen zeu Beheim vnd d(er) cronen da selbens.
Margrauen zeu Mehern. vnd grauen zeu Luczemburg. von vns. vnd vns(er)n. erbn. vnd nachkumen. wegen. fursten vnd herren. der
vorgenant(en) vns(er)r slosser. vnd lande. mit vollem rate. vnd wolbedachtem mute gelobt habn. vn(d) gelobn ouch. mit disem gaint
tigen briue. mit geswornem aide in guten truwen an alles geuerde. Daz wir. vnd vns(er). erbn. vnd nachkumen. vns(er)m obgenanten
herren. seinen. bruder. sinen vn(d) iren. erbn. alle taidinge. einung. vorbuntnuzz. vnd gelubd. die zwischen in vnd ainsiteils. dem hoch
geborn fursten. vnd herren. herrn fridr(ich). Margrauen zeu meyssen. vns(er)m vat(er) seligen. vn(d) vns. gescheen beuestent. vnd vorbunt(en) sint. nach briue
laut. die sie. vnd wir darub(er) gebn habn. stete. vnd gancz an alles irrunge halden sulln. vn(d) welln. Vnd alle stuck vn(d) artickel
die in beider sit(en) darub(er) gebn sint. beslossen sint. vnd begriffen. die sulln in alln iren wesen. volliglichn blibn. Darub(er) zeu ainem offen
barn geczeugnusse habn wir fridr(ich) vnd Balthazar. vorgenant(en). vns(er) insigel. vnd den. wir Ludwig. vnd Wilhelm wanne wir noch nicht
aiginer insigel habn. mit guten truwen. vnd mit geswornem aide. gelobt habn vnd gelobn. an disem selbn briue. alle die vorgenant(en) rede
stete. vnd gancz zeu haldene. an disen brif lazen hangen. Ouch gelobn wir fridr(ich). vnd Balth(azar). obgenant(en). wanne Lud(wig). vnd Wilhelm
vns(er) brud(er) mundig. werdn. vnd aigin Insigel gewunnen. daz wir die an disn brif so wir erst mugen. beslaffen sulln. vn(d) geuerde. besche
he ab(er) von welicher sachen. daz queme. daz dis(er) brif. mit vns(er)r pergen(en) bruder insigel. nicht. versigelt wurde. dannoch sal er an
alln stucken. vnd artickeln. glichweis als ob ire insigel. daran kumen weren. stete. vnd gancz gehalden. werden. Hie bi sint gewest
vnd sint ouch geczeig. d(er) erwirdige in gote herre Johans. Bischof zeu olomucz. vnd die edeln. Wilhelm von landestain. Wernher
von Rodenberk. Bothe von t(er)mperg. herre zeu drnow. fridr(ich) von schonenburg. herre zeu sunnenstain. ahme von coldicz vns(er)
marschalk. vnd die strengen Albr(echt) zeu malicz vns(er) houemeist(er). vnd arnolt Judeman ritt(er). vns(er)s vorgenant(en) herren. vnd vns(er). haim
liche. vnd and(er)s frum(er) lute gnug. Dicz ist gescheen. vnd dirre brif ist gegebn. zeu Budissin nach cristi geburt. dreycen hund(er)t
iar in dem funfczigsten iar. an sant Dorothee tage :