Wir Stephan von gotes gnaden Phaltzgrafe bi R(e)ine und Herczoge in Beyern Bekennen und
tun kunt offenlichn an disem brief alln den die in sehn od(er) horen lesn Daz wir dem aller
durchlauchtigistn fursten und unsim gnedigen herren H(er)rn Karl Romisch(e)m kunge ze alln czeiten mer(er)
des Reichs und kunge ze Beheim seinen erbn und nachkomen kungen ze Beheim eintrechticlichn mit
wolbedachtem mute mit rechten trewn und an alles geverd fur uns uns(er) erbn und nachkomen
gelobt habn und gelobn auch in kraft dicz briefes Daz wir kainen iren man od(er) undersezen
dien des künigreichs ze Beheim ze hofgesinde man od(er) dien(er) enpfahen welln noch schulln
in dhainweiz noch kainen iren man dien(er) od(er) undersezen wid(er) sie schirmen vertedingen halden
noch furbiten sulln in dhainweiz Zcu urkund dicz briefes besigelt mit unsim Ingesigel Geben
Zcu Nurenberg nach k(ri)stes geburt Dreuczenhund(er)t Iar dar nach in dem ain und funfczigistn
Iare des nehsten Dinstages nach des heiligen Leichnams tag zc