Wir Rudolf von gots gnaden pfaltzgraff bi Ríne hertzoge in Beyern des heiligen Römischen Ríches obrister trugseze und
vogt in swaben landen bekennen uns offenliche mit disem briefe daz wir den edeln herrn Ulrichen und Johansen gebrüdern
Landgrafen von Leuchtenberg unsern lieben oheimen schuldig sin und geben sullen zwei tusent guldin florin güt und geb
umb ir danknemen dienst die sie uns bis her geton habent und noch furbaz tün sullent und mügent und och umb daz daz
sie unsern Rete gesworn habent und wie wir in der selben zweier tusent guldin sullen bewiset han nach des edeln herren
unser lieben oheims Johansen burggrafen von Nürenberg Rate als sie des briefe von uns dar umb habent des bewisen
wir sie und ir erbe der selben zweier tusent guldin uff aller pfantschaft die sie von uns inne habent es si von unsers
vater keiser Ludwigs seligen wegen daz uns zü teil ist an gevallen oder die sie von uns inne hant nach irer
briefe sage die sie dar über hant und sullen die selben pfantschaft inne haben nützen und niessen nach irer rechten
als ir briefe saget die si dar über hant als lange bis daz wir sie oder unser erben von in oder iren erben umb die
vorgenanten zwei tusent guldin zü der sume gelts die in vor dar uf verschriben ist nach ir briefe sage erledigen und erlösen
gar und gentzliche ane geverde wer och daz wir oder unser erben sie oder ir erben die vorgenanten zwei tusent guldin
bewisten uff unsern zollen oder sust anderswo da si irs gelts sicher sin so sol die vorgenante unser pfantschaft umb die
vorgenante zwei tusent guldin uns und unsern erben von in und iren erben ledig und los sin ane widerrede und ane
alles geverde und des zü urkünde geben wir in disen briefe besigelt mit unserm insigel der geben ist zü der
Nüwenstat an sampztag nach sant martins tag nach cristus gebürt drützehenhundert jar und dar nach
in dem zwei und fümfzigsten jare