Wyr Burgermeister Rathute vnd dy Burger gemainlich der Stat czu Lewinberg Bekennen vnd tun kunt offenlich mit desim brife allen den di in sahen adir horen lesen Wann der hochgeborne furste vnd herre her
Bolke herczoge von slezyen vnd herre czu furstinberg zur swidnicz vnd zu dem Jawor vnsir lieber genediger herre mit wolbedachtem mute vnd mit Rate siner getruwen manne Angesehin hat di besundere fruntschaft
vnd liebe vnd ouch di sundirliche truwe di vnsir er di Allidurchluchtigste furstinne vnde frawe frawen Anna Romische kuniginne zu allen cziten gemererinne des Richs vnd kuniginne czu Beheim etwenne seliger ge
dechtnisse herczogen heinrichs vnsirs herren sines brudir tochtir vnsir genedige frawe begriffen hat vnd von angeboren gute stetlichen meinet vnd hat ir der obgenanten vnsir frawen vnd ires leibes erben
beides geslechte di sie mit dem allidurchluchtigstem fursten vnd herren hern karl Romischem kunige czu allen cziten merer des Reichs vnd kunige ze Beheim gewinnet alle sine furstentim herczogtum vnd her
schafte zu der swidnicz vnd züdem Jawor mit allen andern steten vesten vnd czugehorungen verschriben vnd vermacht in allir der maze als in sime furstlichen brifen da nach begriffen ist in semlichem lute Wir
Bolke von gots gnaden herczoge von slezie herre czu furstinberg zu der swidnicz vnd czu dem Jawor Bekennen vnd tuen kunt offenlich mit desem brife allen den di in sehen adir horen lesen das wir haben Angesehin die
sundirliche gnade vnd fruntliche gunst des allidurchluchtigsten fursten vnd herren hern karls Romischen kunigs ze allen cziten merer des Reichs vnd kunigs ze Beheim vnsirs lieben gnedigen herren di er vns vnd
vnsim geslechte bewiset hat mit der kuntschaft di geschehin ist zwischin im an einim teil vnd der durchluchtigen furstinne frawen Annen der Romischen kuniginne vnd kunigin ze Beheim vnsir lieben frawen vnd an
men etwenn herczogen heinrichs seligen vnsirs brudir tochter an dem andern vnd darumb geben machen vnd verschriben wir der obgenant vnsir lieben frawen vnd aninen als einir kuniginne zu Beheim vnd
ires leibes erben di sie mit dem obgen vnsirm herren dem kunige haben wirdet vnsir herczogetum furstentum vnd herschaft zu der swidnicz vnd zu dem Jawor mit den steten swidnicz strygon hayn lan
dishute Richmbach Nymps Jawor Lewinberg hifsperg Bunczlaw vnd Grodecz mit den festen vnd mercken Greifenstein Greifinberg Lanchonow kinschsberg hornspurg vnd kynsburg mit allen manne
czinscheften lehen lehenscheften verlehenen gutin gerichten czollen atungen cinsen gulden krenten anschelden kirchlehen pfrunden vnd gots gaben welden puschen bergen slichten wazzern wazz
louffen molen wism waidin geiaide wailmade nichten nuczen gewonheiten vnd allen czugehorungen wi man di genennen mag mit sundirlichen worten nichticznicht Ausgenemen in allir der
maze als wir is yczunt haben vnd her noch mit rechte an vns brengin mochten In sulchir bescheidenheit gei dat sache daz wir von gots verhenkunge also verscheidin daz wir eliche leibes erben mannes
geslechtes hindir vns nicht lazen das dann di obgenant vnsir genedige frawe vnd liebe anine vnd ires leibes erben di sie mit vnsirm herren dem kunige haben wirdet als do vor geschriben stat die sel
ben vnsere herczogetum furstentum herschefte lant lute vnd allir andir czugehorunge als do vor beshriben ist erbin vnd besiczen sal genczlichen vngehindirt vnd do mite tuen vnd lazen noch freir willekur
als mit irem rechten erbe Vnschedlich doch der hochgeborn furstinne frawen Agnessen vnsir elichen wirtinne in irme leibgedinge wann sie alle die vorgenant furstentim lant vnd herscheffte mit allen nuc
czin haben vnd besiczen sal in ir ganczin lebitagin wari abir daz wir mit gnaden gots eliche leibes erbin mannes geslechte gewinne so sullen di selben vnsir erben der obgenan vnsir frawen vnd aninen vnd
ires leibes erben ob sie nicht wari Czehen tusent schog grozzir pfenninge pragschir munge mit gureium gelde berichtin vnd beczalen adir di vesten lewinberg vnd Bunczlaw mit iren wichpilden veste
rechten nuczen vnd czugehorunge czu rechtem pfande seczen als lange vncz daz sie die obgen Czehentusent schog genczlich berichtin vnd beczalen vnd da mite sullen denne di selben vnsir erben bei den vorgen
vnsirn furstentim herscheften vnde landen vngehindirt bleibin wari ouch daz wir eliche leibes erben mannes geslechte nicht hetten vnd doch tochter liezen so sullen di obgen vnsir liebe genedige frawe adir
ires leibes erben di sie mit vnsim herren dem kunige gewinnet ydicher vnsir tochtir Czehen tusent schog grozir pfennige geben vnd sie bestaten noch rechter gewonheit als gebornir fursten kinder Ouch habn
wir gelobt vnd geteidinget Bei der sache da di obgenante vnsir eliche wirtinne vnsirn tot gelebte daz sie danne noch der czit vnsirs todis seinen Burggrauen pfleger adir amptman vff vesten husern in
steten adir in landen vor baten adir wechsiln sal es sie danne daz sie einen bidirman der do güt gut vnd gewiz sei dem ersten an sein stat secze an den obgenante vnsir frawen adir iren erben moge
billich genugen vnd daz der selbe zu vor sich allir gelubde eyde vnd truwen virbinden habe der obgen vnsir frawen der kuniginne adir iren erben eglich sinir wisfaren in des stat er geseczet wirdet
Were ouch daz di obgenant vnsir gnedige frawe vnd liebe anine wartende des obgen anevalles e wanne sie in gewer queme also sturbe das sie leibes erben mit dem obgen vnsim herren nicht gewinne
so sullen alle irin stetir knechte Burggrauen Burger vnd alle lantsazen allir der obgenante eyde vnd gelubde ledig sein doch in sulchir bescheidenheit das dem obgenante vnsirm herren dem kunige vnd
sime erben daz obgen Gelt vnd heimsture der obgen Czehentusent schog gevallen sal adir mit pfande gesichirt werden in allir der maze als do vor begriffen ist das sie da mite tuen vnd lazen noch freyr
willekur vnd daz gebin wem sie wellen wari ouch das di obgen vnsir genedige frawe vnde liebe anine den obgenante vnsirn herren den kunig obirlebte vnd einen andirn man neme an vnsirn danc vnd
willen so sullen beide sie der man vnd alle kint dy sie mit im gewinnet in den obgen vnsir furstentim vnd herschefte nichtes haben Ouch ist gerecht vnd geteidingt daz di obgen vnsir frawe di kuniginne
vnd vnsir liebe anine noch ymand von iren wegin vns vnd vnsir erbin mannes geslechte vmb keinirlei erbteil adir vmb keine andir sache anriden adir ansprechen sullen andirs wenn do vor geshri
ben ist Ouch meine vnd wellen wir get daz sache das vns ehaftige not angetin wirdit vmb gewingsaft krieg adir andir geschefte vnsir adir vnsir manne ere vnd leip gelezen daz wir dann der
selben vnsir furstentim lant vnd leuthe gewaldig sein zu tuen vnd zu lazen doch in guten truwen vnd an alle geuerde dornoch seint dem mal daz vns der obgen genedig herre mit sulchin sime gnaden
gunstlich vnd fruntlich begriffen hat so gelobin vnd wellen wir im mit guten truwen an geuerde beigestendig vnd beholfen sein wedir allirmenlich nyemand ausgeneme vnd in nymmir vnderwegen zulazen
mit leibe noch mit gute vnd alle seine viende sullen vnsir viende sein vnd meine vnd wellen ouch keine seine rottin stetin adir viende Cristen Juden adir heiden in vnsirn landen huczen hofen haldin adir vir tei
dingin dy widir daz recht sein vnd recht nicht tuen wellen di gunnen wir im vnd sime amptluten daz sie die sellen anagreiffen vnd richtuerigen sullen vnd mogen wo sie der bekome in allen vnsirn herschef
ten vnde landen mit vrkund ditz briefes versigilt mit vnsirm grozzen Ingesigel der gegebin ist zu der swidnicz Noch Crist geburd dreiczenhundirt In dem dreivndfumfczigstem Jare an der nehsten mitwoche
noch sancte petirs vnd pawils tage der heiligen zwelfbotin Da von durch sundir lieber gebot des obgen fursten vnd herren herczoge Bolken vnsirs lieben genedige herre der vns das geboten vnd geheize
hat mit lebendir stime vnd in offinbar geginwertikeit sein edlen getruwen manne so haben wir mit wolbedachtin mute mit worte gunst wissen vnd willen der gancze gemeinschaft allir vnsir mit
burger der obgen allidurchluchtigsten furstine der Romische kunige vnd ze Beheim frawen Annin vnsir genedigen frawen vnd iren leibes erben di sie mit dem obgen fursten vnd herren kunig karl irem eliche
wirt gewinnet gehuldir gelobt vnd gesworn hulden gelobin vnd swern daz wir wenn is zu sulchin schulden komet als do vorgeschriben stet in vnsirs herre herczog Bolken brife ir vnd den selben iren
leibes erben wenn sie mit hulfe gots die gewinnet getruwe gehorsam wartende vnd vndertenig sein wellen als vnsir naturliche vnd angebirner herschaft in allen den punkten meininge vnd artikiln
vnd in allir der maze als di obgen vnsirs herren herczog Bolken brife sprechin vs genome doch din artikil der zu dem lesten in dem selben brife stet vmb die hulfe die beid der obgenant kunig karl vnde ouch
vnsir herre herczoge Bolke ein andir tun vnd leisten sullen wann vns di selben gelubde nicht angetin vnd zu den andirn vnsirn sachen vor uff wir gehuldir vnd gesworn haben nicht gehoret mit vrkunde
dicz brefs versigilt mit vnsir stat Ingesigil der gegebin ist zu der swidnicz Noch Criste geburd dreiczenhundirt vnd dor noch in dem dreivndfumfczigsten Jare des nehsten dunnistagis noch sance petirs
vnd pawils tage der heiligen Czwelfbotin