Wir Albrecht von Gotes genaden pfalenczgrafe ze Ryn und Herczog in Bayrn Bekennen und tůn chunt offenleich mit disem
brief allen den die in sehent oder horen lesen Das wir mit sunderleichem rat der hochgeborn fursten und h(er)ren Lud(wigs) Marggrafen
ze Brandenburg unsers pruder Ruprechts des eltn(er) pfalenczgraven by Ryn und Herczogen in Bayrn unsers lieben vettern Albrechts
des swaher und Růdolfs des suns Herczogen ze Osterreich unser Oheim und ander fursten freunde und edelr leute mit
wol bedachtem müt und mit gutem willen Dem allerdurchleuchtigsten fursten und h(er)ren h(er)ren Karln Romischem künig ze allen zeiten
merer des Reichs und künig ze Beheim uns(er)m lieben h(er)ren swaher und vater gelobt habn und geloben auch mit guten trwen ane
geuerde mit dem geswornen aid den wir daruber zü den heiligen getan haben Daz wir die hochgeborn furstinne die Herczoginne von
Lignicz des obgen(anten) unsers h(er)ren des künigs tochter und mümen die er in seinem künigklichen haus freuntleich erczogen hat zü
einer eleichen wirtinne und zü rehter h(er)rschaft nemen welln und süln von disem heutigen tag innendig einem ganczen iare
oder in kurczern vristen wenne oder auf welhe czeit uns h(er)r der künig des ze rat wirt Und mainen und welln ir geben
Dreizzigtausent guldin florin güt von gold und swär von gewichte ze reht(er) morgengäbe da mit ze tůn und ze lazzen nach freyer
willkure Und das selb gelt machen wir der obg(enanten) furstinn unser gemaheln auf unser stat ze Nabbendorf mit iren mauren
und zollen und auf dem Gericht ze Dietfurt mit dem kasten und seiner zugehörung daz si die selben ze reht(er) morgengäbe
innehaben und besiczen sol ob an uns von todes wegen icht geschech uncz an die czeit das unser erbn oder nachkom(en) ir die
obgen(anten) dreizzig tausent guldin gar und ganczlich ausrichten und beczaln Auch geloben wir mit guten trwen an geu(er)de daz wir die
czweinczig tausent guldin di uns der vorgen(ant) unser h(er)r der künig ze haimsteur geben sol und alles ander gelt das er uns von
seinen gnaden schaffend wirt an chein stat wenden noch legen süln und da mit nicht anders tůn denne nawt nach seinem sund(er)leichen
rat Mit urkúnd ditz briefs der versigelt ist mit unserm anhangenden Infigel Und gebn ze Passawe Nach Cristi gepurt
dreuczehnhundert Jare darnach in dem drev und fúmfcigistem Jare des freitags nach sand Alexij tag