Wir Ruprecht der elter von gots gnaden pfallentzgrafe bi dem Ryn des heiligen Römischen richs obirste truchsesse und hertzog in Beiern bekennen und tün kunt offenlich mit disem brive allen den in
sehen oder horen lesen daz wir mit wolbedachtem müte mit rate unser freunde und mit rechter wüssen dem allerdurchluchtigstem fursten und herren hern Karl Römischem künige ze allen zeiten
merer des richs und künige ze Beheim unserm lieben gnedigen herren seinen erbn und nachkömen künigen ze Beheim und der cronen desselben künigrichs erbeclichen und ewiclichen umb
zwelftusent mark lötiges silbers domit er den hochgeborn hern Ruprechten den jungern unsers bruder son us sinem gevengnisse von sachsen gelediget und gelöset hat die nachgeschribn vesten Neu
westat stornstein hirso und liehtenstein und dornach umb zwentzig tusent mark lötiges silbers die er auff seliger gedechtnisse den hochgeborn fursten hern Rudolfen etwenn pfallentzgrafe
bi dem Ryn und hertzogen in Beiern unsern liebn bruder uns wissentlich gewendet und gelihen hat die nachgeschriebn vesten stete und merkte sultzbach Rosenberg hertenstein Neidstein purrendorff pult
polistein hoenstein lichteneke frankenberg lauffen eschenbach hersbrücke awirbach velden pegnitz und die plech und alles daz unser bruder der egenant zu Beiern inngchabt und besessen hat mit alln
dorfen leuten herschefften guten gerichten bannen zöllen geleiten vorsten wispennen gulten zinsen nutzen vellen welden puschen gäugden vogelweiden wiesen weiden wazzern mülen wasserleuffen
teichen wischenen bergen gründen slichten gemarken kreuzen weichpilten und allen nutzen ob und und der erden wie man die genennen mag und auch mit rittern knechten mannen gotshewsern lehen
lehenstiefften verlehenten guten kirchenlehen und gots gabn dienern eigenen leuten pfantschefften von dem reich oder sust von ymanden anders und allen zugehörungen erbe und aigen als is gelegen
ist pfantschafft furpfantschafft recht und redelich verkauft habn in alle der mazze als selder obgenant unser bruder seliger ingehabt und besessen hat und als si von sinem tode uff uns erbeclichen verval
len waren und verzeihen uns fur uns unser erbn und nachkömen ewiclichn alles rechten ansprache und anredunge die wir zu den obgenanten vesten steten merkten und allen zugehörungen als
si davor begriffen sind gehabt habn haben oder gehabn mochten in dheine weis und verzeihen uns auch aller hilfe geistlichs und werentlichs rechten und aller gesetze keiserlicher und bäbstlicher brive
der lande gewonheit und aller ubunge und behaltnisse domit dieser kauff mochte in dheineweis gehindert werden und meinen daz wir unser erbn und nakömen uns domite nymer in dheinen zei
ten mit dem rechten oder mit der tat mit worten od(er) werken behelfen sülln oder wullen auch gelobn wir mit guten truwen an geuerde fur uns unser erbn und nachkömen dem obgenanten unserm
herren dem künige seinen erbn und nachkömen künigen ze Beheim daz wir in und der cronen desselben künigrichs alle die obgenanten vesten stete merkte und zugehörungen als si davor begriffen
sint versprechen und entwerven sülln und wulln fur unsern vettern keiser ludwigs seligen kindern hertzogen Ruprecht dem jungern dem obgenanten unsers bruder sun und fur allermennlich
und fur alle ansprache eines iglichn wie der genennet sei als in den landen recht und gewonlich ist und zu merer sicherheit haben wir gebeten die erwirdigen fursten und herren hern Ger
lach ertzbischoff zu mentze hern albrecht zu wirtzburg hern gerharden zu speir die bischöue und die hochgebornen fursten hern Rudolfen hertzogen in österich hern albrechten pfallentzgrafe
bi dem Ryn und hertzogen in Beiern unsern vettern und die edelen hern johansen von katzenelnbogen ludowigen und friderichen von ötingen die grafen und hern lutzen von honloch daz si
zu ewigen gedechtnisse und zu getzugnisse des obgenanten kaufes ire insiegel geruchen bi daz unser an diesen brieff zu henken und wir gerlach von gots gnaden ertzbischoff zu mentze des
heiligen richs ertzkanceler in deutzschen landen albrecht von wirtzburg gerhart von speir die bischöue und wir Rudolf hertzog in österriche zu steir und zu kernden albrecht
pfallentzgrafe bi dem Ryn und hertzog in Beiern von denselbn gots gnaden johans von katzenelnbogen ludowig und fridrich von ötingen grauen und lutze von hoenloch bekennen of
fenlich daz wir durch sunderliche bete des obgenanten hochgebornen fursten hern Ruprechts des eltern pfallentzgrafe bi dem Ryn des heiligen richs obirsten truchsessen und hertzogen in
Beiern unser insigel zu getzugnisse und zu ewiger gedechtnisse des obgenanten kaufes an diesen brieff habn wissentlich gehenket der gebn ist zu hagenow nach crists geburt drizehnhundert jar darnach in dem drü und funfzigstem jare an dem nehsten dinstage vor aller heiligen tag