Wir Ruprecht der Junger von gots gnaden pfallenczgrafe bi Rín vnd hertzog in Baiern Bekennen vnd tůn kunt offenlich
mit disem briue allen den die in sehent oder horent lesen daz wir mit wolbedachtem můte mit rate vnser frunde vnd
auch mit rechter wizzen des allerdurchluchtigsten fursten vnd herren h(er)n Karls romischen kunigs zcaln zcite mer(er) des Ríche
vnd kunigs zc Beheim vnsers liebn gnedigen herren die nachgeschribn vesten Hartenstein vnd die merkte Hersprucke vnd
Aurbach die von dem heiligen Rích lehen sint mit alln rechten herscheften nutzcn vnd zugehorungen wie man die benen
nen mag dem kunigrich vnd der Cronen zc Beheim zü rechtem erbe vnd erblehen recht vnd redelich uerkauft habn
in aller der mazze als die obgenat(en) vesten merkte vnd ire zugehorungen nach tode seliger gedechtnizze des hochgeboren
fursten h(er)n Rudolfs etwenne pfallenczgrafen bi Rín vnd hertzogen in Baiern vnsers liebn vettern auff vns veruallen
waren vnd als in briuen die wir daruber gebn haben ist vollenkumelich begriffen dauon bitten wir den obgen(anten) vnsern
herren den romischn kunig daz er mit romischer kuniglicher macht denselbn kouff gerůche zü bestetigen vnd dieselben
vesten der cronen vnd dem kunigrich zü Beheim zü rechtem Erbe vnd erblehen machen vnd verlehen wulle an vrkunt
diz briues besigelt mit vnserm Jngesigel der gebn ist zü Hagenow nach Cristus geburt dreizchen hundert vnd in dem
dreivndfunfczigstem Jar des nehsten dinstags nach aller heiligen tag