Wir der gesworn Rat vnd die Burg(er) gemeinleichn d(er) Stat zu Sulzpach bekennen vnd tůn kunt offenleichn
mit disem briefe alln den die in sehent horent oder lesent Wann der hochgeborn furste h(er)r Rupprecht der
elter Pfalntzgraf bei Reine des heiligen Romischn Reichs obrist(er) truchsez vnd hertzog in Beyrn vns den
wir nach tode seines bruder seligen etswenn vns(er)s h(er)ren erntleichn vallen waren vns vnd vnser Stat ze
Sulzpach mit iren zů gehorungen mit wolbedachtn müt mit rât sein(er) freunt vnd mit gůtem willen dem
allerdurchleuchtigsten fursten vnd h(er)ren h(er)rn Karln Romischn künge zu alln zeiten mer(er) des reichs vnd küng
zů Beheim seinen erbn vnd nachkomen kůngen zu Beheim vnd der Cronen des selbn künigreichs ewikleiche
vnd erntleiche mit etleichen and(er)n steten vesten vnd gerichten zů eym rechten vnd redlichn kaufft hat als
in briefen die vber den selbn kauff gemachet seind ist vollenkomenleichn begriffen vnd hat vns vnser erbn vnd
nachkomen Burg(er) vnd einwon(er) der obgen(anten) Stat zu Sulzpach aller gelubde huldunge vndertanikeit vnd eide
da mit wir im in deheinerweise vpundn mohtn gesein ledig vnd los gesatzt vnd hat vns zu dem obgen(anten) vns(er)m
h(er)ren dem künge als zu einem künge von Beheim vnd zu seinen erbn vnd nachkomen kůngen zu Beheim
vnd zu der Cronen des selbn künigreiches willekliche vnd vngetwunge(n) geweist. Da habn wir mit wol=
bedachtm müt vnd mit gemeinem rât mit wort wizzen willen vnd gunst vns(er)r gemeinleich(er) der obgenanten
Stat zu Sulzpach fur vns vnser erbn vnd nachkomen ewikleichn dem obgen(anten) vns(er)m h(er)ren dem künge als
einem küng zu Beheim seinen erbn vnd nachkomen kůngen zu Beheim vnd der Cronen des selbn
künigreichs als vns(er)m naturleichn erntleichn h(er)ren gehuldet gelobt vnd gesworn. Auchn gelobn wir swern
daz wir im ewe holt vndertanig vnd gehorsam sein welln vnd sülln ewiklichn in aller der mass als Burg(er)
iren angeborn erbherren an tůn pflichtig seind. Zů vrkund ditz briefs v(er)sigelt mit vns(er) Stat Insigele
der gebn ist do man zalt von Cristes geburt drewzehn hund(er)t Jare dar nach in dem drew vnd
funfzigsten Jare an dem nechsten Jentag nach sant Mertins tag