Wir d(er) Burgmeister der Stat und di Burg(er) gemeinlichen d(er) Stat zu Egr bekennen und tun kunt offenlichen mit disem brive allen den di in sehen od(er) horen lesen. Als un(ser) h(er)re
des allerdurchluchtigisten fursten und h(er)ren h(er)ren Karls Romisch(e)s kunigs zu allen ziten mer(er) des R(e)ichs und kunigs zu Behem uns(er)s h(er)rn genedigen h(er)ren di er als sein pfantschafte
d(er) Stat und des Lande zu Egr und d(er) vesten Ploz und Markstein und waz dar zu gehoret gehabt hat und di auch selbs gedecht uns(er)s h(er)rn hochgeborn fursten etwen kunige zu Behem
sein eltern durch merklich sachen willen von dem heyligen R(e)iche behalden und erworben hab(e)n von wid(er)zemer ungeschicht beide ub(er)renet und vlorn sint daz er daz mit sein reht niht beweisen
mage als billich wer. Wan sint demal daz di selb pfantschaft den kurfursten des heyligen R(e)ichs beide geistlichen und weltlichen wol kundig ist und si ir brive zeugnuss mit irn
anhangenden Insigeln dar ub geb(e)n hab(e)n und wir auch sullich(er) gelegenheit wol und gentzlich underwiset sint daz di obgenant Stat zu Egr mit dem Lande und d(er) vesten Ploz und Markstein
mit allen zugehorungen dem kunigrich und d(er) cronen zu Behem umb virczig tusent Mark lotiges silbers sehsthalben guldein Floren gewicht fur a(in)e die Mark gereiten zu rehtem pfande reht
und redlich von wegen des heiligen R(e)ichs gesatzt sint und sein eltern und vordern kunige zu Behem in gewere und reht(er) besitzunge d(er) selb(e)n pfantschafte gewesen sint und er noch ist
auf disen hutigen tage. Wane auch di obgenanten kurfursten geistliche und weltliche angesehen hab(e)n die besund(er) genade den nutz(e)n fleize und di steticleiche arbeit da mit d(er) obgenant uns(er)
h(er)re das heiligen R(e)iche nutz und ere getrewlich und steticleich hat und auch gebrumet hab(e)n di merklichen getrewen dienst di sein eltern etwen hochgeborn kunige zu Behem dem obgenanten R(e)iche
erlichen und nutzlichen offte getan hab(e)n. Wanne auch daz kunigriche zu Behem ein edle wirdigez geliet ist d(er) Romischen cronen so meynten und wolten si sullich(e)n schaden des obgenanten
kunigrichs zu Behem sunderlichen umbkeren durch di besund(er) trewe da mit si als kurfursten dem heyligen R(e)iche ubunden sein auf di rede daz d(er) obgenant uns(er) h(er)re daz selbe sein kunig
riche und di crone zu Behem durch sullich(e)n zweispalt niht beschedigt od(er) gemindert wrden so hab(e)n si besant mit wolbedachtem mute mit reht(er) wizzen und mit iren off(e)n(e)n briv(e)n daz
di obgenant Stat zu Egr mit dem Lande und di vesten Ploz und Markstein mit dorffern mit edlen und unedlen armen und reichen freigen und allen zugehorungen
di in den gemerken d(er) selb(e)n Lande und vesten gelegen und besezzen sint des obgenanten uns(er)s h(er)ren als eines kunigs zu Behem siner erbn und nachkumen kunige zu Behem und
d(er) cronen des selb(e)n kunigrichs rehte pfantschafte lange gewesen sein und noch sein fur virczig tusent Mark lotiges silbers sullich(e)s gewichtes als do vor begriffen ist. Und di selb(e)n
pfantschaft hab(e)n di selb(e)n kurfursten bestetigt mit reht(er) wizzen in aller d(er) maze als do vor begriffen ist und hab(e)n auch dar zu geben ire gunst willen und wort als si als
macht hab(e)n als kurfursten des heiligen Romischen R(e)ichs. Des hab(e)n wir angesehen di redliche gezeugnuzze und kuntliche underweisunge als do vor geschrib(e)n stet. Und d(a) von
wir d(er) obgenant(er) Burgmeist(er) d(er) Stat und di Burg(er) gemeinlich d(er) Stat zu Egr mit rate gunst wizzen willen und worte uns(er)r gemeinschafte unbetwungen mit
freijer cur und mit wolbedachtem mute fur uns unser erbn und nachkumen so hab(e)n wir gehultet gelobet und gesworen hulden geloben und sweren dem obge
nanten uns(er)m h(er)ren kunge Karle als einem kunge zu Behem sinen erbn und nachkumen kungen zu Behem und d(er) cronen des selb(e)n kunigrichs daz wir in zu den
vesten Ploz und Markstein semmenlichen zu einem rehtem pfande fur di obgenanten virczig tusent mark silbers als do vor begriffen ist getrewe holt undteinich
und gehorsam sein wollen und sullen als uns(er)n rehten h(er)ren. Z(u) urkunde ditzs brives besigelt mit uns(er)r stat Insigel. Der geb(e)n ist zu Egr nach crist(e)s geburte
dr(e)yzehenhundert Jar und dar nach in dem virundfunfzigisten Jar in dem nehsten sontage nach Ostern als man singet Quasi modo geniti.