Wir Rudolf von gots gnaden hertzoge in Sachsen des heiligen reichs oberster marschalk Bekennen vnd tun kunt offenliche mit disem briue allen den di in sehen
oder horent lesen Alleine di briue des allerdurchluchtigesten fursten hern karls romischen kunges zu allen zeiten merer des reichs vnd kunges zu Beheim vnsers
liebn gnedigen herrn di er uber sine pandschafte der stat vnd des landes zu Eger vnd der vesten floz vnd Barchstein vnd waz darzu gehoret gehabet hat vnd di
ouch seliger gedechtnisse di hochgeborn fursten etwanne kunge zu Beheim siner eltern durch muglicher sachen vnd dem heiligen reiche behalden vnd erworben
haben von wiedertzeiner vngeschicht beide verbrunet vnd verlorn sin daz er da mide sin recht nicht bewisen mag als billiche were doch sint dem male daz vns di
selben pandschaft wol kundig ist vnd wir slicher gelegenheit wol vnd gentzliche vnderwiset sin daz di obgen(ante) stat zu Eger mit dem lande vnd di vesten floz vnd
Barchstein mit aller zugehoruge dem kunigriche vnd der cronen zu Beheim vmb viertzigtausent mark lotiges silbers sechstehalben gulden florengir gewichte
fur iecliche mark zu rechen zu rechtem pfande rechte vnd redeliche von wegen des heiligen reichs versetzet sint vnd sin eltern vnd vorfarn kunge zu Beheim in
gewer vnd rechter besitzunge der selben pfandschafte gewesen sin vnd noch ist uff disen hutigen tag des haben wir angesehen di besundern gnade vnd den nutzen
fleiz vnd ouch di stetliche arbeit do mit der obgen(ante) vnser herre des heiligen reichs nutz vnd ere getruweliche vnderstanden hat vnd habn ouch gepruuet di ming
lichen getruen dienst di sin eltern etwenn hochgeborn kunge zu Beheim dem obgen(anten) reiche erliche vnd nutzliche offte getan habn wan auch daz kunigrich zu Be
heim eyn edels wirdiges gelid ist der romischen cronen So meynen vnd willen wir slichen schaden des obgenante kunigrichs zu Beheim dermazen
dersten durch di besundern truwe do mit wir als ein kurfurste des heiligen reichs verbunden sin vff di rede daz der obgen(ante) vnser herre daz selbe sin kunigreich
zu Beheim durch sulchen zwiuel nicht beschediget oder gemindert werde So bekennen wir mit wol bedachtem mute vnd mit rechter wizze daz di obgen(ante) stat
zu Eger mit dem lande vnd di vesten floz vnd Barchstein mit gerichten dorfern mit edeln vnd vnedeln armen vnd richen renten vnd zugehorungen di
in den gemerken der selbn lande vnd vesten gelegen vnd gesezzen sin des obgen(anten) vnsers herren als eynes kunges zu Beheim siner erben vnd nachkomen ku
nge zu Beheim vnd der cronen des selben kunigreichs rechte pfandschafte lange gewesen sin vnd noch sin vor vierzigtausent mark lotiges silbers soliches
gewichtes als da vor begriffen ist vnd di selben pfandschaft bestetigen wir mit rechter wizzen in aller der maze als dauor begriffen ist vnd gebn darzu vns
gunst willen vnd wort als eyn hertzog von Sachsen oberster marschalk vnd eyn kurfurste des heiligen reichs mit urkunde dis briues versigelt mit
vnserm grozzen Ingesiegel Der gebn ist nach cristus geburte druzehen hundrt Jar vnd dar nach in dem vier vnd funfftzigesten Jar uff
sente michahelis tag