Wir dietrich fridrich heinrich Albrecht vnd otte gebruder von wildenuels bekennen vnd tun kunt offenlich mit disem brief allen den die in
sehen oder horen lesen daz wir mit wolbedachtem mute mit rate vnsir freunde vnd mit gutem willen vnser haws zu wildenuels von dem all(er)
durchleuchtigisten fursten vnd h(er)ren h(er)n karl Romischem keiser zu allen zeiten merer des Reichs vnd kunge zu beheim als von einem kunge
zu beheim vnd von der cronen desselben kungrichs zu beheim zu rechtem manlehen empfangen haben vnd haben dem edlen manne
h(er)n Albrechten sorsseben von Turnaw vnsim freunde gancze vollenkumene macht vnd ouch gewalt gegebn dem egen(anten) vnsim h(er)ren dem
kunge zu beheim vnd der cronen desselbn kungrichs zugelobn vnd zusweren zu den heiligen vff vnsir sele daz wir dem obgenante(n)
vnsim h(er)ren als einem kunge zu beheim seinen erben vnd nachkumen kungen zu beheim vnd der cronen desselbn kungrichs ewichlich
getrw hold gehorsam vnd ouch vndertanig sein wellen vnd sullen als vnser erblichen herschaft vnd allez daz gein in tun daz manne
gein iren rechten h(er)ren durch recht vnd durch erber lobliche gewonheit zutun pflichtig sind vnd daz dem egen(anten) vnsim h(er)ren als eime
kunge zu beheim seinen erben vnd nachkumen kungen zu beheim ewichlichen vnd iren obristen vnd amtleuten daz egen(ante)
vns(er) haus wildenuels offen sein sol zu allen iren notdurften wider allermenglich niemant vzgenomen vnd alle die vorgen(anten) gelubde vnd
ouch eyde die der egen(ante) Albrecht von vnsir wegen getan hat die gelobn wir zuanderweiden vnd zuinuwen mit vnser selbs gegenwer
keit wann wir desselben von dem egen(anten) vnsim h(er)ren dem kunge zu beheim oder seinen erben vnd nachkumen kungen zu beheim erma
net werden vnd alle die obgen(anten) gelubde vnd eyde vnd yelichs besunder geloben wir fur vns vnsir erben vnd nachkumen ewichlich dem
egen(anten) vnsim h(er)ren seinen erben vnd nachkumen stet gancz vnd vnubrukct zuhalden vnd zuhalten vnd zu merer sicherheit vnd ouch
zu ewigem gedechtnuzze diser sachen haben wir gebeten die edlen leute h(er)n Albrecht nothaft vom tyrstein h(er)n heinrich von
wildenstein von wildenuels vnd h(er)n heinrich von wildenstein vom torembg daz sie ouch ire Infigel an disen brief zu gezeugnuzze
gehangen haben vnd wir die vorgen(anten) Albrecht nothaft vom tyrstein heinrich von wildenstein von wildenuels vnd heinrich von
wildenstein vom torembg bekennen offenlich daz wir durch sunderlicher bete willen der egen(anten) dietrichs fridrichs heinrichs Albrechts
vnd ottens gebruder von wildenuels vnsere Infigel zu gezeugnuzze an disen brief gehangen haben mit vrkunde dicz briefs ver
sigelt mit vnsir aller Infigel der gebn ist zu sulcpach nach christs geburt dreuczenhundert jar vnd in dem sehs vnd fumfczigste(n)
jare an dem nechsten freitag nach sanct dyonisen tag