Wir Vlrich vnd Johans gebruder Lantgrauen vom Lutenberge bekennen vnd tun kunt offenlich mit disem brief
allen den die yn sehen oder horen lesen daz wir mit samter hant wolbedacht vnd mit rat vnsr frunde reht vnd
redlich verkouft haben dem Allirdurchluchtigstem fursten vnsirm genedigen herren hrn Karl Romischem
Keiser vnd kunig zu Beheim sinen erbn vnd nachkomen kunigen zu Beheim vnd der Cronen desselben
kungrichs zu Beheim die stat vnd vesten Pegenitz die vnsir frei eigen ist mit leut gut gult gerichte vn(d)
alle ir zugehorung vnd dar zu den hof vor der stat den wir von herman Storen kynden kauft haben vnd ei
nen andirn hof zu Buchach der gewesen ist Johans frankenbergers vnd daz vischewazzer daselbs mit alle nut
zen vnd zugehorungen vmb Neun hundirt schok grosser Prager muntz vnd werung die vnsir herre der
Keiser vnd kunig zu Beheim vns an bereitem gelt vnd pfenningen bezalt gebn vnd gewert hat vnd wir die
selbn in vnsirn nutz haben entfangen vnd globen in guten truwen vor vns vnsir erben vnd nachkome dem
vorgen(anten) vnsirm herren dem keiser vnd kunige zu Beheim seinen erbn vnd nachkomen kunigen zu Be
heim vnd der Cronen desselben kungrichs zu Beheim werschaft derselbn stat veste leute gut gult vnd
vischewazzer zu tun als reht ist des zu vrkunt haben wir Vlrich vnd Johans Lantgrafen vom Luten
berge vnsir Ingesigil an disen brieff gehangen Gebn zu Gretz nach cristus geburt dreuzenhundirt Jar
dornach in dem syben vnd funfzigstem Jar am nechsten dornstag nach des heiligen sant Martins tag
Per cons(ilium) d(omi)no Imp(erato)ri
Henr(icus) de wes(t)