Wir Friderich Balthazar vnd Wilhelm von gotes gnaden Lantgrauen zcu Duringen Marggrafen zcu Myssen in dem Osterland vnd zcu Landsperg Grauen zcu Orlamund vnd H(er)ren des
Landes zcu Plessen Bekennen vnd tun kunt offenlich mit disem briue all(e)n den die in sehen horen oder lesen Daz wir mit wolbedachtem mute mit Rate vns(er) getruwen vnd(er)tanen
in guten truwen on geuerd vns v(er)bunden habn vn(d) v(er)bunden auch mit dem Hochgeborn(en) fursten H(er)ren Johans Margrauen zcu Merhern vns(er)m liebn oheim vn(d) Swag(er) sinen erbn vn(d) nach
kumen Margrauen zcu Merhern vnd gelobn mit geswornem eide fur vns vns(er) erbn vnd nachkumen Lantgrauen zcu Duringen vn(d) Margrauen zcu Myssen daz wir im den obgen(anten) sinen erbn
vn(d) Nachkumen bigestandig getruw vn(d) geholfen sin sulln vn(d) wolln ewiglich zcubehalden ire furstentvm Land Herschafte Erb gut ere Recht vn(d) gewonheit Vnd die hilf sulln vn(d) wolln
wir tun mit aller vns(er) macht on geuerd wid(er) allermenglich von den sie angetastn gehindert od(er) geschedigt wurden vnd die in ir libe furstentvm Herschafte Land oder Lute geistlich od(er)
werltlich manschaft Lehen vesten Burge Stete gut vn(d) alle ire zcugehorunge wo oder in welichen landen die gelegen sint die sie yczunt habn od(er) furbaz in d(er)zcit gewynnen gussen wolten
od(er) sie d(er)an hindern Vzgenumen den allerdurchluchtigsten fursten vnd h(er)ren h(er)ren Carl Romisch(e)n keis(er) zcu allen zcitn mer(er) des Richs vnd kunge zcu Beheim vns(er)n liebn gnedigen H(er)ren
sinen erbn vnd nachkumen kungen zcu Beheim wann sie d(er) Margrauen zcu Merh(er)n rechte herren sin vn(d) ire Land die Marke zcu Merh(er)n von im zcu rechtem furstenlehen ruwen Vnd wanne wir
od(er) vns(er) erbn od(er) nachkumen Lantgrauen zcu Duringen vnd Margrauen zcu Myssen von wegen des obgen(anten) vns(er)s oheim Margrauen zcu Merhern siner erbn vn(d) Nachkumen
des ermanet werden So sulln vn(d) wolln wir jnnewendig firczeen tagen od(er) so wir schirst mugen nach dem als der hulfe not geschicht on geuerd nach dem tage sulch(er) manung im zcu hilfe ku
men in d(er) maze als dauon begriffen ist Wanne auch wir den egen(anten) vns(er)m oheim od(er) sinen erbn od(er) nachkumen zcu hilfe kumen od(er) vns(er) volk in zcu hilfe senden So sulln sie vns od(er) die selbn
die wir senden werden mit bier mit brote backenspeise vn(d) wo man nicht zcu felde lege mit futer besorgen on geuerd Nemen ab(er) wir od(er) die vns(er)n d(er)innen schaden des sint sie vns nicht pflichtig
zcu zcundtun Gewinnen wir ab(er) miteinand(er) vesten die in vns(er)n landen beidsit nicht gelegen weren od(er) von vns beidsit nicht zculehen giengen die sulln wir brechn od(er) sulln sie glich miteinand(er) teiln
wie vns daz allerbest geuellet Nemen wir aber frumen an vesten die in vns(er)n landen gelegen weren od(er) von vns zcu lehen giengen der frume sal vns alleine blibn Were aber daz wir od(er) die
vns(er)n frumen neme an geuangen die sullen wir nach rechtes mangel gewapent(er) lute glich miteinand(er) teilen Zcu vrkund dicz brieues v(er)sigelt mit vns(er)n jnsigeln Der gebn ist zcu Prage nach
Cristes geburt Dryczen hund(er)t iar darnach in dem Acht vnd funfczigsten Jar an dem nehsten donrestag nach dem Sontage als man singet Reminiscere in der vasten