Wir Ruprecht der elter von gotes gnadn Pfalenczgraue by Rine des heiligen Romisch(e)n Riches obrister Truchsesse.
vn(d) Herczog in Beyern. Bekennen vn(d) tůn chvnt offenlichn mit disem briefe. allen den die in sehent od(er) horent le
sen. Daz vns kunchlichn vn(d) wissentlichn ist. vnd daz selbe vnser eltern. vnd vordern Herczogen zü Beyern. an vns
vn(d) seliger gedechtnisse den Hochgeborn. Herczog Růdolf. vns(er)n bruder her bracht habn. Daz die. Vesten. vn(d) merkte
der Hohenstein. Hersprugge. vn(d) Erbach. die von vnsers bruders Herczog Růdolfs des vorgen(anten) tode vf vns verfalln
waren vnd die wir dem alladurchluchtigsten. Fůrsten vn(d) herren. h(er)n Karln Romisch(e)n Keyser. zü alln ziten merer
des Richs. vnd Kůng zü Beheim. vns(er)m liebn gnedigen herren. als einem Kůng zü Beheim. vnd der Cronen des selbn
Kůngriches. zü Beheim. reht. vnd redlichn vkavft habn. von nyemand anders rüren. danne von dem heiligen
Romisch(e)n Riche. Vnd wir vnser eltern. vn(d) bruder ez von nyemand anders. gehabt habn. nůr von dem heiligen Riche
als da vor begriffen ist Mit vrkůnd ditz briefes. versigelt mit vns(er)m Ingesigel. Gebn zü Heydelb(er)g. nach cristus
gebůrt. Drüzehen hundert Jare. Dar nach in dem ahteen vnd fůmfzigsten Jare. am nehsten Dornstage
nach der heiligen zwelfbotn. sant Peters vnd sant Pauls tage :