Wir Wilhelm von gots gnaden der heiligen kirchen zu Colne Ertzbischoff des heiligen Romischen Richs in Jtalien Erczkent
zeler bekennen vnd tun kunt offinlich mit disem briefe allen den die yn sehen odir horen lesen Wann vormals die Stat ze
Eger mit dem lande vnd die vesten flozz vnd parkstein mit yren zugehorungen den hochgeborn kunigen zu Beheim
vnd der Cronen desselben künigrichs vor virczig tusent marg lotiges silbers von wegen des heiligen Romischen Richs zu rech
ten pfande versetzet sin Vnd wann wir vnd and(er) vnser mittelkurfursten mit warhaftiger kuntschaft wol vnderwiset sin daz
flozz die vesten vnd waz darzu gehoret des künigrichs zu Beheim rechtes eygen ist vnd von vnwizzen vnd vnefal dem egen(anten)
künigrich ze Beheim zu pfande wurden ist in der wise als vnser vnd andir vnser mittelkurfursten briefe die wir doruber
geben haben volkomelich ist begriffen douon vnd vff die redde daz die hochgeborn künige zu Beheim vnd die Crone
desselben künigrichs in der andirn pfantschaft vngehindirt verliben sint dem male daz flozz als vorgeschriben ist yr
rechtes eygen ist vnd darumb ir pfant nicht gewesen mag So meinen sprechen vnd kuren wir mit wolbedachtem mude
als ein kurfurste des heiligen Richs vnd in Jtalien Erczkanzeler daz die obgen(anten) hochgebornen künige zu Beheim yr Erben
vnd nachkomen eweclich vnd die Crone desselbn künigrichs zu Beheim die obgen(anten) virczig tusent marg lotiges silbirs
vff der Stat zu Eger vnd dem lande vnd auch vff der vesten parkstein vnd yren zugehorungen haben sullen als die
pfantbriefe sagen die von des Romischen Richs wegen doruber gebn sint glicherwis als ob flozz in der egen(anten) pfandungen
nie benennet we(re) zut vrkunde ditz briefs versiegilt mit vnsum Jnsiegil der gebn ist zu Colne nach Cristus geburt
druczenhundirt Jar dornach in dem acht vnd funfczigistem Jar an sant Stephans tage als er funden wart