Ich Heinrich genant der lange von plawen Embieten Edeln Rittern knechten verlehenten mannen Burgm(an)n(en) dienern gebauwern vnd allen gemeinſchefften in der herſchefte zu plawen iren Steten vnd dor
fern fleizziglich meynen gruz Ich tun euch allen offenlich zeuwiʒen an dieſem gege(n)wertigen briewe Wann ich fur etlichn zeiten heinrichen dem Jungen von plawen meynes bruder ſon meynen rechten
Erbeteil der mich an der herſchaft zu plawen vnd allen iren weichpilden Greniʒen Gerichten herſcheften Guten Rente(n) Gulten Geleiten forſten holtzpergen hulczen Empen nutʒen velden welden
puſchen Gereyden vogelwaiden Eckern wieſen weiden waʒern teichen waʒerleuffen teichen viſchereyen bergen Grunden Slichten Gewyrken kreizen vnd allen nutʒen ob vber vnd vnder der Erden wie
mann die genennen mag Rittern knechten mannen geanſeſſen lehenen lehenſcheften verlehenten guten kirchlehen vnd Gotsgabn dienern eygenen lewten pfantſcheften von dem Reiche od(ir) ſuſt von yemat
and(ir)s ob ſie do ſein vnd alln zuhorungen wie mann die nennet mit ſunderlichn worten angehoret hat od(ir) noch in dheinenweis angehoren mochte mit gutem willn vnd wolbedachtem mute verkaufet han
vnd mir doran behalden vnd auʒgenomen hatte eynen Erbeclichen anfal ob der egena(n)t heinrich meynes bruders ſon ane eliche erbn mannes geſlechte abginge vnd habn dorub deʒ allerdurchleuchtigſten
furſten vnd h(er)r(e)n h(er)r(e)n karls Romiſche(n) keiſers zu allen zeiten merers deʒ Reichs vnd kuniges zu Beheim meynes gnedigen herren lawbe vnd gunſt nicht gehabt als ich von rechte tun ſolde wann er
als ein kunig ze beheim ein rechter lehenherre iſt der vorgenant(en) herſchefte zu plawen die von ym als von eynem kunige zu beheim vnd der Cronen zu beheim rechtlich zu lehen ruret des ich auch von
dem egenanten meynem h(er)r(e)n dem keiſer als eynem kunig zu Beheim vor furſten Grauen vnd Edlen zu rede geſaſt bin Douon hab ich mit wolbedachtem mute vnd recht(e)m wiʒʒen vnd mit rate meyner
fründe mich des vorgen(anten) anfalles vnd mit namen alles rechten hoffenunge zuuerſicht eygenſchaft vnd anſprach der ich mich verſehen hab verſehe od(ir) ymer verſehen muchte in dheinenweis an der
egen(anten) herſchaft zu plawen vnd allir irer zugehorungen alls douor begriffen iſt gar vnd genzlich in guten trewen one geu(er)de vnd durch recht lauterlich v(er)ziegen vnd v(er)zihn mich auch vor mich meine
erbn vnd Nachkomen ewiclich vnd auch fur alle die wer ſie auch ſein od(ir) geſein muchten die von meynen meyner erbn vnd Nachkomen wegen dheynerlaie zuuerſicht anſprach od(ir) vorderung dar
zu habn muchten vnd hab gelaʒʒen vnd laʒe auch mit rechter wiʒʒen euch alle beſampt vnd auch beſund(ir) Edle Rit(ter) knechte vlehente mann Burg(man)n(en) dien(er) gebawr vnd alle gemeinſchafte in der egen(anten)
herſchefte zu plawen iren Steten vnd dorfern vnd alle euw(er) Nachkomen vnd erbn ewiclich frey ledig vnd los aller eyde huldunge vnd gelubde der ir mir pflichtig od(ir) verbundn geweſin ſeit vnd
der ich mein erbn vnd Nachkomen od(ir) ymand von vnſ(er) wegen euch nu od(ir) in kumftigen zeiten ym gemanen od(ir) angeſprechn muchten vnd han gelobt vnd gelob auch fur mich mein erbn vnd Nach
komen ewiclich dem egn(anten) meynem h(er)r(e)n dem keiſer als eyne(m) kunige zu Beheim ſeinen erbn vnd nachkom(en) kunigen zu Beheim mit guten twen an eydis ſtat vnd on alles geu(er)de daʒ wir die obgen(anten) herſchaft zu
plawen vnd alle ire zugehorung als douor beſchriebn iſt die ich v(er)kaufet vnd von mir entpfremdit habe vnd auch den anefall den ich mir daruff behalden wolde allein eʒ mit rechte nicht geſein muchte
vnd euch die obgen(anten) edle(n) Rit(ter) knechte verlehente man Burgm(an)n(en) dien(er) gebawrn vnd alle gemeinſchefte d(er) herſchefte zu plawen irer Stete vnd dorfer euw(er) erbn vnd nachkomen nymer in dheynen zeitn
in Gerichte od(ir) auʒwendig gerichtes angeſprechn vord(ir)n haften od(ir) ſuſt in dheinenweis bekumern welln od(ir) ſulln Vnd ob ich mein erbn vnd nachkomen od(ir) ymand von vnſ(er) wegn dowyed(ir) icht teten in
gerichte od(ir) ſuſt in dheinenweis daʒ ſol keynerleie craft od(ir) macht habn vnd ſol vntugelich vnd vnnutze ſein ewiclichn vnd ſol dem egen(anten) meynem h(er)r(e)n dem keiſer als eynem kunig zu Beheim ſeinen
erbn vnd Nachkom(en) kunigen zu Beheim vnd d(er) Cronen deſſelbn kunigreichs keinen ſchadn bringen als ich ub(er) diʒ alleʒ meinen brief dem obg(enanten) meinem h(er)r(e)n gegebn habn mit meinem anhangenden
Inſigel vnd auch mit furſten Grauen vnd Edler anhangenden Inſigeln geſigelt die da alln dieſen ſachn gegenwertig waren Furbaz han ich gelobt vnd gelobe in guten twen an eydis ſtat vnd on alles
geu(er)de dem egen(anten) meinem h(er)r(e)n dem keiſer daʒ ich an dem tage ſo ich erſte von ſein(er) gegenw(er)tikeit ſcheide eines ſlechten geruertes varen wil vnd ſol vnub(er)zog(en)lichn zu plawen in die ſtat vnd alda euch alle
offenlich los frei vnd ledig ſagen kunden vnd laʒen aller eyde huldung vnd gelubde als douor volkomenlich begriffen iſt Vnd als oft ich dorub(er) von dem egen(anten) meynem h(er)r(e)n dem keiſ(er) ſeinen erbn od(ir)
Nachkomen kunigen zu Beheim geuordert wirde in kunftigen zeiten als dicke wil vnd ſol ich dorzu komen vnd euch v(er) erbn vnd nachkomen ſulcher eyde huldunge vnd gelubde hier los vnd
ledig laʒen vnd dorub(er) gar vnd genzlich verzeihn one geu(er)de Zu vrkunt diʒ brieues den ich auch dorub(er) ſende v(er)ſigelt mit meynem anhangendem Inſigel Der gebn iſt zu prage an dem Abend
der heiligen Auffart vnſers h(er)r(e)n Nach got(es) geburt Drewzehnhundert Jar dornach in dem Newnvndfunfczigſtem Jare