Ich Heinrich genant der Lange von plawen Embiete Edeln Rittern knechten verlehenten mannen Burgern dienern gebawren vnd allen gemeinschefften in d(er) herscheffte ze plawen inen Steten vnd dorffern fleizziclich
meinen gruzz Ich tun euch alln offenlich ze wizzen an disem gegenwortige(n) brieff Wann ich vor etlichen zeiten Heinrichen dem Jungen von plawen meines bruders Sun meinen rechten erbteil der mich an
d(er) herschafft ze plawen vnd allen iren weichpilden gerichten gerichten herschefften guten bennen zollen geleiten vorsten wiltpennen gulten zinsen nigen felden welden puschen geiezden vogelweiden ackern
wysen weyden wazzern mulen wazzerleufften teychen vischereyn bergen grunde sluchten gemarken kreisen vnd alln nugen ob vbir vnd vnd(er) der erden wie man die genennen mag Rittern knechten man=
nen manschefften lehen lehenschefften vlehenten guten kirchenlehen vnd gotesgaben dyenern eygenen leuten pfantschefften von dem Reiche od(er) sust von yemanden and(er)s ab sie do sein vnd alln zugeho=
rungen wie man die nennet mit sunderlichen worten angehoret hat od(er) noch in deheineweis angehoren mochte mit gutem willn vnd wolbedachtem mute verkauffet han vnd mir doran behalden vnd
ausgenumen hatte einen erblich anefal ab d(er) egen(ant) Heinrich meines brud(er)s Sun an eliche erbn mannes geslechte abeginge Vnd hab dorubir des alludurchleuchtigsten fursten vnd herren h(er)rn Karls Ro=
misches keys(er)s ze alln zeiten merers des Reichs vnd kimges ze Beheim meines genedigen herren laub vnd gunst nicht behabt als ich von rechte tun solde Wann er als ein kunig zu Beheim ein recht
lehenherre ist der vorgen(anten) herscheffte ze plawen die von ym als von einem kunig ze Beheim vnd d(er) Cronen ze Beheim rechtlich ze lehen ruret des ich ouch von dem egen(anten) meinem Herren dem keys(er)
als eim(e) kunig ze Beheim vor furste(n) greuen vnd edln ze rede gesazt bin Dauon hab ich mit wolbedachtem mute vnd rechte(m) wizzen vnd mit rate meiner frunde mich des vorgen(anten) anefalles vnd mit na=
men alles rechten hoffennuge zcuersicht eygenschafft vnd ansprach der ich mich v(er)sehen habe v(er)sehe od(er) ymm(er) v(er)sehen mochte in deheineweis an der egen(anten) h(er)schafft ze plawen vnd allir ir zugehoring
als douor bes(ch)rib(e)n ist gar vnd genzlich in gute(n) trewe(n) an geuerde vnd durch recht leuterlich v(er)zigen vnd v(er)zeihe mich ouch fur mich mein erbn vnd nachkome(n) ewichlich vnd ouch fur alle die wer sie ouch sein od(er) gesein moch
ten die von meine(n) mein(er) erbn vnd nachkome(n) wegn deheinerley zeuersicht ansprach od(er) vorderunge dorzu habn mochten vnd hab gelazn vnd laz ouch mit rechte(m) wizzen euch alle besamt vnd ouch besund(er) Edle
Rit(er) knechte vlehente man Burg(er) dien(er) gebawr vnd alle gemeinscheffte in d(er) eg(enanten) herscheffte ze plawen inen Steten vnd dorffern vnd alle ew(er) nachkomen vnd erben ewichlich frey ledig vnd los allir eyde hul
dunge vnd gelubde d(er) ir mir pflichtig od(er) vbunde(n) gewesen seint vnd d(er) ich mein erbn vnd nachkomen od(er) yemand von vns(er)n wegen euch nu od(er) in kumftige(n) zeiten ymm(er) gemane(n) od(er) anspreche(n) mochte Vnd
han gelobt vnd globe ouch fur mich mein erbn vnd nachkomen ewichlich dem egen(anten) meine(n) herren dem keys(er) als einem kunig ze Beheim seine(n) erbn vnd nachkome(n) kunige(n) ze Beheim mit guten trewen an eydes
stat vnd an alles geuerde daz wir die obg(enanten) herschafft ze plawen vnd alle ire zugehorunge als douor beschribn ist die ich verkauffet vnd von mir empfremdet hab vnd ouch den anefal den ich mir doruff
behalden wolde allene es mit rechte nicht gesein mochte Vnd euch die obgen(anten) Edle Rit(er) knechte vlehente mann Burg(er) diener gebawrn vnd alle gemeinscheffte der herscheffte zu plawen in ir(n) Stete(n) vnd
dorff(er)n ew(er) erbn vnd nachkomen nymm(er) in deheinen zeiten in gerichte od(er) auswendig gerichtes ansprechen vordern eyschen od(er) sust in deheineweis bekumern wollen od(er) sullen Vnd ab ich mein
erben vnd nachkomen od(er) yemand von vns(er)n wegen dorwid(er) icht teten in gerichte od(er) sust in deheineweis das sol keinerley krafft od(er) macht habn vnd sol vntugelich vnd vnnuge sein ewichlichen vnd
sol dem egen(anten) meinem herren dem keys(er) als einem kunig zu Beheim seine(n) erben vnd nachkomen kunigen zu Beheim vnd d(er) Crone d(er)selbn kunigreiche keinen schaden bringen als ich ubir das
alles meine brieff dem obg(enanten) meinem herren gegebn hab mit meine(m) anhangenden Jngesigel vnd ouch mit fursten greuen vnd edeler anhangenden Jnsigelen gesigelt die by alle disen sachen
gegenworticlich waren furbas han ich gelobt vnd globe in gute(n) trewen an eydes stat vnd an alles geuerde dem egen(anten) meine(n) herren dem keys(er) daz ich an dem tage so ich erste von seiner gegenwertikeit scheide
eines slaffes geuertes faren wil vnd sol vnuerzogenlich ze plawen in die Stat vnd aldo euch alle offenlich los frey vnd ledig sagen kunden vnd lazen aller eyde huldung vnd gelubde als douor
volkomenlich begriffen ist vnd als offe ich dorubir von dem egen(anten) meinem h(er)ren dem keys(er) seine(n) erbn od(er) nachkome(n) kunigen ze Beheim geuord(er)t wirde in kumftigen zeiten als dicke wil vnd sol
ich doran komen vnd euch ew(er) erbn vnd nachkomen sulch(er) eyde huldunge vnd gelubde frey los vnd ledig lazen Vnd dorubir gar vnd genzlich v(er)zeihen an geuerde Mit urkund diz briues den
ich euch dorubir sende v(er)sigelt mit meinem anhangenden Jngesigel Der gebn ist zu Prage an dem abent der heiligen auffart vns(er)s herren Nach seiner geburt dreuzehnhund(er)t Jar dornach
in dem Neun vnd funfzigistem Jare